Бројот на луѓе што живеат со дијабетес во светот во 2015 изнесуваше 415 милиони, а се очекува да се зголеми до околу 642 милиони до крајот на 2040 година што е еднакво на еден од десет луѓе во светот
Дијабетесот е многу честа и сериозна болест на глобално ниво, но луѓето со дијабетес тип 2 често може да немаат никакви знаци или симптоми и воопшто да не се свесни дека ја имаат болеста. Токму од оваа причина, докторите советуваат дека тестирањето за дијабетес тип 2 е многу важно, бидејќи колку порано се утврди болеста толку е полесно да се промени и спречи нејзиниот развој и манифестација.
Овогодишната тема на Светскиот ден на дијабетесот го носи насловот „Eyes on Diabetes“ со што во фокусот се става токму важноста на тестирањата за заболување од дијабетес тип 2, како и на поскорото третирање со цел намалување на ризикот од сериозни компликации, вклучувајќи го ризикот од срцев удар, хронична хипергликемија, оштетување на видот, бубрезите, нервите, крвните садови и срцето.
Факти за дијабетесот во светот
- Бројот на луѓе што живеат со дијабетес во светот во 2015 изнесуваше 415 милиони, а се очекува да се зголеми до околу 642 милиони до крајот на 2040 година што е еднакво на еден од десет луѓе во светот.
- Еден од двајца луѓе во светот има недијагностициран дијабетес.
- Многу луѓе во светот живеат со недијагностициран дијабетес тип 2 долг временски период без да имаат симптоми и да се свесни за состојбата што резултира со чести компликации по дијагностицирањето.
- Заболувањето од дијабетесот тип 2 може да се превенира или да се одложи преку здравиот начин на живот до 70% што е еднакво на 160 милиони случаи до 2040-та.
- Сè поголемото слабо исхранување и физичката неактивност помеѓу децата и младите во многу неразвиени земји во светот, ги зголемува шансите дијабетесот тип 2 да стане глобален здравствен проблем со сериозни исходи.
- Дури 12% од глобалните трошоци во здравството во моментов се трошат на возрасните што боледуваат од дијабетес.
- Бројот на луѓето што боледуваат од дијабетес во сиромашните и неразвиени земји ќе продолжи да се зголемува со што ќе постане закана за нивниот одржлив развој; на пр. до 2040-та година, бројот на заболени од дијабетес во Африка се очекува двојно да се зголеми.
- Тестирањето за заболување од дијабетес е есенцијално за третирањето на сите видови дијабетес.
- До крајот на 2040 можно е повеќе од 640 милиони од луѓето во светот да живеат со дијабетес.
- Повеќе од 93 милиони возрасни во светот, односно еден од тројца, коишто живеат со дијабетес, имаат развиено дијабетична ретинопатија (компликација од дијабетесот што резултира со оштетување на видот, т.н дијабетична болест на окото).
Ризични фактори за заболување од дијабетес тип 2
- Заболување од дијабетес во семејството (родители, брат/сестра);
- заболување од хипергликемија во семејството;
- физичка неактивност;
- прекумерна телесна тежина;
- висок крвен притисок;
- високо ниво на холестерол;
- полицистични јајници.
Кој треба да се тестира за дијабетес?
Според Американската асоцијација за дијабетес, се препорачуваат тестирања на временски интервали од три години кај сите пациенти над 45 годишна возраст, особено оние што имаат прекумерна телесна тежина. Доколку, пак, се присутни некои од погоре наведените ризични фактори за заболување од оваа болест, тестирањата треба да се прават почесто и на порана возраст. Докторите препорачуваат возрасните со висок крвен притисок или висок холестерол да се тестираат почесто со цел да се намали ризикот од понатамошни кардиоваскуларни заболувања.
Што доколку тестот е негативен?
Доколку тестот за заболување од дијабетес е негативен, консултирајте се со вашиот доктор за временски интервал кога би го повториле тестирањето. Во меѓувреме внимавајте на исхраната, проверувајте го крвниот притисок и нивото на холестерол во крвта и вежбајте редовно.
Што доколку тестот е позитивен?
Доколку тестот за заболување од дијабетес е позитивен, консултирајте се со вашиот доктор за потребни дополнителни тестирања за дијагностицирање на болеста. Оттука, докторот можеби ќе ви препише лекарства во придружба на диети и режим на исхрана со цел да ви помогне да го регулирате шеќерот во крвта и да превенирате сериозни комликации.
