Дознајте кои се знаците и симптомите на фоликулит
Фоликулит е честа состојба на кожата при која влакнените фоликули се воспалуваат. Најчесто е предизвикана од бактериска или габична инфекција. Прво се појавуваат мали црвени брунчиња или гнојчиња околу влакнените фоликули – тоа се мали отворчиња од кои излегуваат влакната. Инфекцијата може да се прошири и да се претвори во тешко излекувачки, крустозни ранички. Оваа состојба не е животозагрозувачка, но може да биде болна, засрамувачка и пропратена со јадеж. Ако премине во потешка инфекција може да предизвика постојано губење на влакната и лузни. Ако е полесна инфекцијата, најверојатно ќе помине по неколку дена со основни мерки на лична хигиена. За посериозни или повторувачки фоликулити треба да се консултира доктор.
Знаците и симптомите се:
- групи на мали црвени брунчиња или бели гнојчиња кои се развиваат околу влакнените фоликули;
- меури исполнети со гној кои прскаат и прават крусти;
- црвена и воспалена кожа;
- чувства на јадеж и печење;
- чувства на болка или преосетливост;
- зголемени, отечени грутки односно плочи.
Фоликулитисот е предизвикан од инфекција на влакнениот фоликул, најчесто од бактерии но истотака може и од вируси, габи, па дури воспалението може да биде и од враснато влакно. Состојбата може да биде површна или длабока, зависно колкав дел од влакнениот фоликул е зафатен. Колку е подлабока инфекцијата, толку е потешка. Влакнените фоликули се најгусто поставени на косматиот дел од главата (скалп), а се присутни по целото тело освен на дланките, табаните, усните и мукозните мембрани односно слузниците. Оштетените фоликули се под ризик од инфекција.
Најчестите причини за оштетување на фоликулите се:
- триење при бричење или тесна облека;
- топлина и влажност, предизвикани од носење гумени ракавици или опрема;
- некои кожни состојби како воспаленија на кожата предизвикани од најразлични причини и акни;
- повреди на кожата, како гребаници, убоди или хируршки рани;
- покривање на кожата како со оклузивни (пластични материјали, фолии) обвивки или фластери и медицински селотејпи.
Секој може да добие фоликулит, но сепак некои фактори може да придонесат да се развие оваа состојба:
- постоење на медицинска состојба која ја намалува отпорноста кон инфекции, како дијабет, хронична леукемија и ХИВ/СИДА;
- постоење на акни или воспаленија на кожата од други причини;
- поранешна повреда на кожата, како од хируршки зафат или удар;
- употреба на некои лекови, како кортикостероидни креми или долготраечка терапија со антибиотици како на пример за акни;
- зголемена телесна тежина;
- постојано носење на облека која го поти и топли телото, како гумени обувки или синтетика;
- киснење во топли бањи кои не се соодветно исчистени односно одржувани;
- бричење или депилација.
Компликации од фоликулитот може да бидат:
- повторувачка или брзоширечка инфекција;
- големи плочки на инфицирана кожа пропратени со јадеж;
- меури под кожата;
- трајни последици на оштетеност на кожата, како лузни или флеки;
- уништување на влакнените фоликули и трајно губење на влакната.
Понекогаш фоликулитите поминуваат без медицински третман, само со подобрување на личната хигиена (користење на чисти крпи и луфи за бањање, кои не смее да се делат со друг човек и треба да се перат со прашок на висока температура исто како и алиштата кои дошле во допир со инфицираната кожа), преземање на мерки за грижа односно нега како употреба на антисептици (нежно миење со антибактериски сапуни два пати дневно, облоги или промивки со раствори како и нанесување соодветни лосиони кои не се одмиваат) и креми против јадежот кои може да помогнат па и да бидат доволни.
Исто така, треба во тој период да се избегнува бричење или да се користи елктричен брич и потоа веднаш да се измие кожата со антибактериски сапун и да се нанесе антисептик.
Ако тоа не е доволно, тогаш треба да се посети дерматолог, кој ќе земе брис за микробиолошко испитување(бактерии) со изработка на антибиограм или брис за миколошко испитување (габички).
Брисот се испитува и зависно од резултатите се открива која е причината за инфекцијата и се препишува соодветна терапија. Многу ретко може да биде потребна биопсија (земање на парче кожа) за да се исклучат други состојби. Исто така во поретки случаи, може да се консултира пластичен хирург кој ќе мора да го обработи инфицираното место хируршки за да се намалат знаците и симптомите, како и компликациите на инфекцијата и евентулните последици.
Ако сите третмани се безуспешни, ласерската терапија може да ја реши инфекцијата.
Овој метод е скап и бара неколку третмани но трајно ја намалува густината на влакната во третираната регија. Можни несакани ефекти од ласерското третирање може да бидат: промени на бојата на кожата, лузни и изгореници.
Може да се спречи повторната појава на фоликулитот:
- да се избегнуваат тесни облеки за да се намали триењето меѓу кожата и алиштата;
- да се сушат гумените ракавици помеѓу употреба откако претходно се превртуваат одвнатре кон надвор и убаво, темелно се мијат со сапун и вода;
- да се избегнува бричење ако може, како и за жените да се избегнува депилација;
- бричење со претпазливост, користење електричен брич или чист, остар жилет секој пат нов.
Треба да се прифатат навики:
- миење на кожата со топла вода и купка за чистење на лицето (антибактериска или антисептична) пред секое бричење или депилирање;
- ако се користи средство со кое се чисти кожата (без одмивање) или луфа при бањање, да се прават нежни кружни движења;
- да се користат навлажнувачки креми или гелови за бричење 5-10 минути пред бричење за да се омекнат влакната;
- да се нанесат навлажнувачки лосиони по бричење кои може да имаат антисептик во нив.
Кога се бричат мажите, треба да го прават тоа во насока на растот на влакната иако е можно и во спротивната насока да биде поделотворно, секој маж треба сам тоа да си го испита. Исто така, треба да се користат само чисти бањи и базени, како и спа центри.
Д-р Вероника Давчева-Битољану, специјалист дерматовенеролог
Дерматолошко Естетска Ординација ВИВИДЕРМ
тел. 02 / 30 99 363 – 070 / 64 14 98
ул. Васил Ѓоргов бр. 34/3-4
www.facebook.com/vividerm.mk
