Иако палачинките сами по себе се многу вкусни, еве и рецепт за торта од палачинки ако сакате да направите нешто малку поразлично
Проблемот со палачинките е дека никогаш не остануваат доволно за торта. Затоа направете повеќе од вообичаено и дваесетина тргнете на страна. А тортата е едноставна, филувана со домашен џем од јагоди и шлаг, за да се ослободат теглите за нови есенски џемови.
- 3 јајца;
- ½ лажиче сол;
- ½ лажица шеќер;
- 2 лажици зејтин;
- 1 шолја млеко + 1 шолја;
- 1 шолја пиво + ½ шолја;
- 2 шолји сенаменско брашно + 1 шолја;
- 1 шолја вода + 1 ½ шолја
- 1 шолја интегрално брашно + 1 шолја.
Во голема вангла, изматете ги јајцата со солта, шеќерот и маслото и потоа додајте брашно и течности. Не е задолжително да се придржувате до овие количини, важно е смесата да биде доволно густа/течна за да може лесно да се разлева по тавчето кога ќе го завртите и да биде мазна, без грутки.
Смесата може да се направи со миксер, а може да измати и рачно. Ако немате пиво, можете да ставите и кисела вода, или само млеко и вода.
Можете да ја оставите смесата во фрижидер околу 30 минути, пред да ги пржите палачинките, ама и не мора. Ставете малку масло во тавчето за палачинки и загрејте го убаво пред да почнете со пржењето. Ставете од смесата во тавчето и завртете го да се разлее по целото дно. Пржете ја палачинката од едната страна додека не почнат да се одвојуваат ивиците, а потоа превртете ја и пржете ја уште кратко од другата страна. Пред да сипете повторно од смесата, капнете неколку капки масло во тавчето. Пржењето оди брзо, особено ако ги правите палачинките во две тавчиња истовремено.
- 20 – 25 палачинки;
- 1 ½ тегла (од 300 мл) домашен џем од јагоди;
- 2 кесички шлаг;
- 250 мл ладно млеко;
- 2 лажички желатин.
Шлагот е како во оваа торта со јагоди. Без шеќер во него, ама ако сакате – ставете. Измешајте го желатинот во малку вода, околу 2 лажици, и загрејте го на средно додека целосно не се раствори. Изматете го убаво шлагот со млекото (според упатството на кесичките), па додајте го желатинот и повторно изматете.
Одвојте дваесетина палачинки за тортата, а другите можете веднаш да ги јадете. Кога палачинките за тортата целосно ќе се оладат, мачкајте ги наизменично со по 2 – 3 лажици џем и шлаг и редете ги една врз друга. последната украсете ја со останатиот шлаг и ставете ја тортата да отстои во фрижидер еден час. Вкусна е и вториот и третиот ден.
* рецептите со во целост превземени од ситно сецкано
