Денес е меѓународен ден на кафето

Знаете ли дека во светот се пијат 2,25 милијарди шолји кафе дневно?

Први октомври е прогласен за меѓународен ден на кафето, датум кој стана официјален минатата година. Нема ништо необично зошто кафето има свој ден, земајќи во обзир дека е најконсумираниот пијалок во светот, после водата. Вистинските љубители на кафе велат дека водата е најважна за живот, бидејќи без вода не можете да направите кафе. На овие простори кафе се пие секојдневно и во големи количини, па слободно може да се каже дека Македонците спаѓаат во оние најголемите љубители на кафе. Се смета дека ритуалот на пиење кафе потекнува од Етиопија, уште од 15-ти век. Денес, Бразил има најголемо производство на кафе во светот и на овој светски ден, се истакнува важноста од фер и етичка трговија со кафе.

Кафето е најефективно доколку се пие помеѓу 9:30 и 11:30 часот наутро. Овој заклучок се заснова на работата на хормонот кортизол. После 9:30 часот наутро, нивото на кортизол опаѓа и ова време истражувачите го сметаат за најдобро за пиење кафе, бидејќи ако кафето се пие кога кортизолот е висок, тогаш се развива толеранција на кофеин, што значи дека кафето помалку делува.

Неколку интересни податоци поврзани со кафето:

• Во светот се пијат 2,25 милијарди шолји кафе дневно;
• Мирисот на кафето е најпрепознатливиот мирис на светот;
• Со 1 до 3 испиени шолји кафе дневно, ризикот од срцев удар се намалува за 7 проценти;
• Кафето е добро за вашиот црн дроб;
• Кофеинот ја подобрува ефикасноста при вежбање;
• Најскапото кафе на светот, се прави од изметот на тајландски слонови.

Неколку совети за сите љубители на кафе: Секогаш пијте го кафето свежо мелено бидејќи има подобар и посилен вкус и никако не го чувајте на влажни места.