Разговаравме со д-р Софијанова за летните стомачни тегоби кај децата и како да се спречат инфекциите чести за овој период од годината
Со покачување на надворешните температури, расте и бројот на цревните инфекции. Овие инфекции, познати и како летни инфекции, се појавуваат и кај децата и возрасните, а најосетливи се лицата со намален имунитет. Причинител за цревните инфекции најчесто се летните вируси што се добиваат од недоволно измиени овошје и зеленчук или, пак, бактериски загадена храна или неквалитетна вода. За тоа колку се чести овие стомачни заболувања, како да се делува превентивно и која е најдобра заштита за децата, разговаравме со Проф. д-р Аспазија Софијанова, директор на Клиниката за детски болести и шеф на одделението за интензивна нега.
Што покажува вашето искуство, дали видливо се зголемуваат стомачните заболувања во летниот период, колкава е нивната зачестеност и кои се нивните главни причинители и симптоми?
Да, секако! Со порастот на температурите се зголемува и опасноста од цревни инфекции. Црвените инфекции ги има од мај до септември, но својот максимум го достигнуваат во јули и август. Притоа пациентите најчесто се жалат на болки во стомакот и нагон за повраќање или повраќање. Се јавуваат и течни столици, кои во просек траат од четири до осум дена. По столицата и натаму останува чувство на лажни повици на празнење. Впечатливи симптоми се и блага малаксаност и покачена температура.
Како децата добиваат стомачни инфекции и како да спречиме ширење на заразата? Што најчесто доведува до стомачни проблеми во овој период од годината?
Пренесувањето на инфекции е преку контаминирана храна, храна која се чува во неадекватни услови, вода од неиспитани природни извори, и неправилно миење на рацете. Се препорачува миење на рацете пред секој оброк.
Кој е правилниот терапевтски пристап во третманот на дијареа и дехидратација кај децата?
Во прв ред, соодветна диетална исхрана и консумирање на течности. Притоа важно е и да се запре дијареата со примена на соодветни пробиотици најдобро во комбинација со цинк и витамин Б6. Во случај на силно изразена клиничка слика, може да биде потребна и хоспитализација и затоа е важно брзо да се реагира.
Како да се избегне дехидрација и колку примената на пробиотици и орални рехидратациски соли помага во надминувањето на дијареата и нејзините последици?
За време на инфекцијата се губи поголема количина на течности и електролити, поради што треба веднаш да се почне со рехидратација, односно со надоместување на изгубените течности и електролити. Клучно е соодветно консумирање на течности, орални рехидратациски соли и пробиотици за да се регулира билансот.
Каква исхрана треба да практикуваат децата со стомачни инфекции?
Лесна исхрана повеќе пати во текот на денот во помали оброци. Храната богата со шеќери како што се слатките, тестенините и лебот треба да се исклучат, бидејќи шеќерите ја разредуваат и онака течната столица. Не е препорачливо да се даваат овошни сокови или газирани пијалоци. Бебињата треба да се дојат нормално.
Кога родителите треба да побараат лекарска помош за своето дете?
При чувство на болка, надуеност или неиспразнетост на цревата треба веднаш да се побара матичниот лекар. Лекарска помош е потребна и доколку дијареата и/или повраќањето се перзистентни и не можеме да извршиме правилна рехидратација по орален пат. Кај бебињата ако нема ниту 1 мокра пелена во рок од 8 часа треба да се побара медицинска помош.
Кој е Вашиот совет до нашите читатели, како да ги превенираат стомачните инфекции кај децата во летниот период?
За заштита и превенција од стомачните инфекции се препорачува избегнување контакт со заболен, темелно миење на овошјето и зеленчукот пред консумирање, чистење и дезинфекција на површините, а особено на детските играчки.
Посебно внимание треба да се обрне на одржување на личната хигиена и развивање на хигиенските навики кај децата.
Исто така, особено е важно редовно миење раце на децата за време на престојот во градинка/училиште, а уште повеќе на плажа. Истотака, соодветна е и превентивна суплементација со пробиотици недела дена пред одење на одмор, за време на одморот и неколку дена после враќање од одморот.
