Ново истражување докажува дека ризикот за заболување од астма кај децата коишто се изложени на добрите бактерии содржани во калта е за 30%-50% помал од оној кај децата кои растат во урбани средини
Децата денеска живеат и растат во хипер-чисто, дезинфицирано и стерилно опкружување со кое сметаме дека ги заштитуваме од лошите бактерии. А, сепак, истовремено сме сведоци на постојан раст на алергии, автоимуни болести и дигестивни заболувања што предизвикуваат проблеми со здравјето на децата.
Точно е дека благодарение на современата хигиена и санитарии, редовно се заштитуваме себеси и нашите деца од многу инфекции и болести што може да го нарушат нашето и нивното здравје. Имено, секој родител со целта да го заштити своето дете користи антибактериски сапуни, спрејови и гелови, и уште многу други производи за дезинфекција. Но многу експерти сметаат дека токму широката употреба на антибактериските производи и средства за дезинфекција го спречуваат правилното формирање на добрите бактерии, што може да се клучот за зајакнување на имунолошкиот систем и за намалување на алергиите, дигестивните и автоимуните заболувања.
Многупати досега е докажано дека играњето во калта во домашната градина или дворот на градинката или училиштето, не само што е забавно, туку и е добро за децата бидејќи го зајакнува нивниот имунитет, а меѓувреме помага и во развивање на нивната имагинација, креативност и сл.
Придобивки од валкање во калта за децата
Го зајакнува имунитетот и го намалува ризикот за заболување од астма
Во едно истражување објавено во дневникот „New England Journal of Medicine“ се вели ризикот за заболување од астма кај децата коишто растат на фарма е помал за 30%-50% од децата коишто растат во градските урбани средини. Исто така, истражувањето докажува дека повремениот контакт со градинарската кал го зајакнува имунолошкиот систем кај децата и го намалува ризикот за развивање на алергии.
Ја развива детската креативност и иновативност
Играњето со калта е слично на слободното играње во песокот на плажа. Оваа игра нема граници и дозволува бесконечни идеи за играње и забавување. Преку играта со калта во градината или во дворот, дома или на училиште, децата ја имаат слободата да уживаат во копање дупки и садење растенија, правење кули од кал и многу др.
Поттикнува комуникација и дружба
Како и секоја друга игра, играта со кал е еден тип на друштвена игра што поттикнува многу забава, развивање на комуникацијата, имагинацијата и дружбата помеѓу децата. Децата ги споделуваат своите идеи и меѓудругото си помагаат во конструкцијата на различни градби од кал со кои би создале еден цел град, како и во приготвувањето колачи од кал што би ги подариле на своето другарче.
Ги прави децата среќни
Едно истражување покажува дека изложеноста на непатогената бактерија Mycobacterium Vaccae што живее во почвата може може да делува позитивно на ослободување на серотонинот – хормонот на среќата, како и во подобрувањето на расположението.
