3Д печатена хидраулична рака што ќе ја револуционализира детската протетика [ВИДЕО]

Раката е дизајнирана да биде соодветна за бебиња од 10 месеци и за деца до 3-годишна возраст

Поранешен професор по психологија, во 2015 започна проект за креација на хидраулични протетски конструкции за деца. Идејата за започнувањето на проектот именуван „Ambionics“, четириесетгодишниот Рајан Бен ја добива по ампутацијата на левата рака на неговиот син.

Користејќи 3Д принтер, Рајан изработи прототип на хидраулична рака за својот син што се очекува да ја промени детската протетика.

Имено, 3Д испечатената рака е изработена да биде соодветна за бебиња до 10 месеци и за деца до 3-годишна возраст. Идејата на Рајан е преку оваа современа технологија во протетиката, малите деца и бебињата родени со деформација или со ампутирана рака да ја добијат можноста да ги развијат своите моторни функции уште на рана возраст што многу би го олеснило нивното детство и понатамошниот живот.  

Во вообичаени случаи кога дете е родено со рака којашто е потполно нефункционална, здравствените установи во Британија можат да обезбедат козметичка, нефункционална рака во период од 8-11 недели. Кога станува збор пак за деца родени со рака со многу мала функционалност, чекањето е уште подолго и децата понекогаш и на возраст од 3 години сè уште немаат функционална рака со која би ги развивале своите моторни способности. Кај овие деца честопати се случува по 2-годишна возраст нивното тело да ја одбива протетиката.

Во соработка со „Autodesk“ и „Stratasys“  и со помош софтверот „Fusion 360“, Рајан успеа да дизајнира прототип на хидраулична рака за својот син, која се состои од функционална дланка што се активира преку специјално дизајнирани перничиња содржани во раката. Хидрауличната рака е спој од мек и цврст материјал – изработена е од гума и пластика коишто на раката истовремено ѝдаваат флексибилност и издржливост.

Раката е обмислена да биде идеално решение за деца на возраст од 10 месеци до 3 години, период кој е клучен за развојот на моториката и движењата. Рајан започна и кампања „Indiegogo“ за финансирање на неговиот проект што може да претставува револуционерно решение во современата технологија и детската протетика.

Погледнете го видеото во прилог: