Бидете одговорни кон своето здравје и заштитете ја кожата од штетните сончеви зраци
Витаминот Д му е многу потребен на организмот, првенствено за здравјето на коските и забите, но и за превениција од остеопороза, рахитис, рак на дебело црево, кожни болести. Изложувањето на сонце е примарен начин за синтеза на овој витамин во организмот, со што тоа е природен извор на витамин Д. Изложувањето на сонце е здраво само доколку е умерено и разумно.
Не го чувајте препаратот со зашитен фактор само за плажа
УВ зрачењето многу брзо делува на кожата. Потребни се само неколку минути на сонце за настанување на пигментација. Заштитата од летното сонце е задолжителна и во текот на секојдневните активности кога сме надвор, а не само за време на летниот одмор кога сме на плажа. Едни од најважните мерки за заштита се:
Избегнувајте непотребно изложување на сонце – лекарите препорачуваат да го избегнете летното сонце во периодите кога е најсилно, од 10 до 16 часот. Затоа, планирајте го вашиот летен ден за да го избегнете најсилното сонце.
Редовно нанесувајте препарат со заштитен фактор – не само што треба редовно да ненесувате препарат со заштитен фактор (на секои 2 часа кога сте изложени на сонце), туку треба и правилно да го нанесувате. Важно е препаратот да ја штити кожата од иритации, изгореници и од исушување, да ја хидрира и храни. Воедно, многу е важно да користите правилен фактор на заштита кој се одредува според вашиот фототип на кожата. Лицата со фототип 1 (светла кожа, очи, светла или црвена коса) треба да користат средства со највисок фактор; фототип 2 (светла кожа, плава коса) – кожата бавно потемнува и е многу подложна на горење – потребен е препарат со заштитен фактор 30; фототип 3 (умерено темна кожа, кафеава коса, кожа која ретко поцрвенува) има самозаштита која трае околу 20 минути и во првите денови е потребен препарат со заштитен фактор 30, а потоа треба да се нанесува фактор 20; фототип 4 (темна коса и кожа) кожа која брзо потемнува и со самозаштита од над половина час, треба да користи фактор 20.
Општо правило коешто се однесува за сите е дека препаратот со заштитен фактор треба да се нанесе половина час пред излегување на сонце.
Носете заштитна облека – носете соодветна светла облека со долги ракави која покрива, очила за сонце со УВ филтри, капа или шешир.
Пред да одите на плажа, одете на лекар
Доколку имате повеќе бенки по телото, задолжително посетете лекар пред да одите на одмор. Ваквиот преглед е задолжителен, бидејќи кожата со многу бенки е најзагрозена од појава на меланом. Ракот на кожа може да се лечи доколку се открие во рана фаза. И доколку немате многу бенки, после туширање правете самопреглед на бенките – дали се зголемуваат или го менуваат обликот и формата и забележете дали имате некакви промени на кожата, како иритации и црвенила. Бидете одговорни кон своето здравје и погрижете се не само да имате тен без црвенило, туку здрава и негувана кожа.
