Неколку совети на коишто треба да посветите внимание за да имате убав и здрав тен на кожата
Со првите топли денови, кај секого се појавува желбата за исончан и убав летен тен. Много често, со цел да добијат темен тен на најбрз можен начин, на многумина им се случува да изгорат после неколку дена изложување на сонце. Потоа следи црвенило, болка и нерамномерен тен – едноставно кажано, ефект спротивен од очекуваниот. Постојат неколку основни правила на кои треба да посветите внимание, коишто воедно ќе ви заштедат и непријатности и време. Следете ги следниве совети и имајте темен и здрав тен ова лето.Подгответе се пред да излезете на сонце
Ексфолијација е важен чекор пред изложување на сонце. Се прави со цел да се отстранат изумрените клетки за да добиете израмнет, односно воедначен тен. Но, со оваа постапка се намалува и заштитниот слој на кожата, па затоа треба да почекате неколку дена пред да се изложите на сонце. И исхраната е дел од подготовката пред изложување на сонце. Важно е да внесуваме продукти како моркови, спанаќ, кајсии, домати, лубеница, тиква, бидејќи тие содржат бета каротен (провитамин А). Овој антиоксиданс ја заштитува кожата од штетното УВ зрачење преку врзувањето на т.н. слободни радикали и ја зголемува продукцијата на меланин во кожата.
Правилно употребувајте ги препаратите со заштитен фактор
Прв чекор е да одберете соодветен и квалитетен препарат со заштитен фактор. Тој задолжително треба да биде комбинацијата од УВА и УВБ – филтри со цел да ја спречи појавата на изгореници и брчки, а со тоа и да го превенира предвременото стареење на кожата.
И доколку имате потемен тен и не горите брзо, задолжително е да започнете со препарат со највисок заштитен фактор, кој понатаму се намалува. Исто така, ни препарат со фактор 50 не ве заштитува, доколку се намачкате само еднаш во текот на денот. Неопходно е препаратот за заштита да го нанесете 30 минути пред изложување на сонце, а потоа треба да се нанесува на секои два часа, особено после капење. Оние со посветол тен и децата, треба почесто да нанесуваат препарат.
Кога нанасувате од препаратот не ги заборавајте ушите, стапалата, делот зад колената, лактите и дланките, како и кожата под костумот за капење.
Препарат за заштита треба да се употребува дури и кога сте под сенка, бидејќи дрво, шешир, чадор, можат само делумно да ве зашитат од штетните УВ зраци, а воедно рефлексијата од морската површина и песокот може да предизвикаат несакано црвенило и иритација. Затоа, задолжително нанесувајте заштитен препарат.
После сончање
После плажа, истуширајте се на тушевите на плажата со ладна вода или дома со млака вода. После тоа, кожата треба да се нахрани и да се намали иритацијата од нејзино изложување на сонце. Нанесете млеко по сончање за да го задржите тенот и еластичноста на кожата. Млекото коешто ќе го нанесете по сончањето, треба да содржи состојки кои интензивно ја негуваат кожата, како витамин Е, бисаболол, (изолирана активна компонента од камилицата со антивоспалителни својства која заштитува од црвенило), Д-пантенол кој не дозволува сушење на кожата.