Светската недела на доењето постои како поддршка за мајките да дојат и овозможува едуцирање на јавноста за здравствените придобивки од доењето
Во тек е Светската недела на доењето која секоја година се одбележува во 1ви до 7ми август во целиот свет. Неделата посветена на доењето, се одбележува од 1992 година, а денес учествуваат повеќе од 1.5 милиони луѓе од над 170 земји. Пораката од СЗО (Светска здравствена организација) и УНИЦЕФ оваа година гласи:
„Поддржете ги мајките да дојат секаде и во секое време. Сите ние можеме да придонесеме кон општество кое го поддржува доењето“, посочуваат СЗО и УНИЦЕФ.
Симболот на Светската недела на доењето асоцира на потребата од поддршка, симболизирајќи ја еднаквоста и поделената грижа околу негата на детето. Нивната порака е дека „Доењето не е само основа за здрав детски развој, туку и основа за развој на една земја“. Доењето е најефективниот начин да се подобрат животите на децата ширум светот, овозможувајќи долготрајни здравствени придобивки како за новороденчињата, така и за мајките. Доењето го намалува морталитетот до петгодишна возраст и го намалува ризикот од болести како детска астма и дебелина. Исто така, доењето ги намалува шансите за дијабетес и срцеви заболувања понатаму во животот. Доењето го заштитува здравјето на мајката помагајќи да се намали ризикот од рак на дојка и рак на јајници.
Затоа со промоција, заштита и поддршка на доењето се промовира подобро здравје и побрз општествен развој. Доењето треба да биде приоритет на здравството во секоја земја, и годинава, Светската Алијанса за Доење – WABA го прифаќа предизвикот да ги промовира стратегиите за правилна исхрана на новороденчиња и мали деца во рамките на одржливиот развој. СЗО го поттикнува доењето како единствен начин на хранење започнувајќи од првиот час после раѓањето па сè до шестиот месец. Се препорачува доење колку што е можно подолго (во период од 6 месеци до 1,5 година), бидејќи мајчиното млеко е клучно за силен имунолошки систем.
Министерството за здравство на РМ, секоја година објавува Програма за активна здравствена заштита на мајките и децата во Република Македонија, а дел од активностите во програмата се посветени на доењето како и на промоција на Светската недела на доењето. На крајот од месец август, „Лулка“ – Здружение за грижа и едукација на бремени жени, мајки и деца, организира едукативна работилница за важноста на доењето, наменета за бремени жени, родители, здравствени работници и сите заинтересирани.
