Редовните прегледи се неопходни за одржување на женското здравје
Постојаната грижа за себе и одржувањето на добро здравје не е едноставна задача. Секојдневните семејните и работни обврски и недостатокот на време и енергија се само неколку од виновниците кои можат да влијаат на здравјето кај жената.
Како можете да го подобрите своето здравје во Новата година? Следниве совети за почеток може да ви помогнат да направите чекор напред кон поставување на реалистични цели на патот кон подобро здравје и благосостојба во 2018.
Практикувајте умереност, наместо целосно исфрлање на храна
Вообичаено во месецот јануари кога жените ќе решат дека сакаат да го загубат вишокот килограми тие често имаат тенденција целосно да отфрлат некои групи на храна од секојдневното мени, како, на пример, онаа што содржи јаглехидрати. Но ова всушност може да има контра-ефект. Зошто? Бидејќи техниката “сè или ништо“ и става етикета на храната како „добра“ или „лоша“. Кога луѓето гледаат одредени работи како „лоши“, можат брзо да почувствуваат опседнатост околу нив. Оттука, пристапот за намалување на консумација на одредена храна е многу пореален и поефективен.
Обидете се да кажете дека во Новата година ќе ги намалите десертите, или дека ќе изберете еден ден во кој ќе се почастите со парче торта ли чоколадо.
Поставете си остварливи фитнес-цели
Многу жени во вежбањето си поставуваат одредени цели и започнуваат да вежбаат во теретана на справи. Ова често резултира во обесхрабрување затоа што во одредената временска рамка којашто ја предвиделе може да се случи да не постигнат намалување на тежината или формирање на мускулна маса. На крајот, може да се откажат поради недостаток на време, енергија или пари.
Доколку решите во Новата година да си поставите фитнес-цели обидете се истите да бидат реални, остварливи и добро дефинирани. Не се фокусирајте на тоа дека одредена вежба треба да се направи на одреден начин, на одредено место, во одредено време и за одреден временски период, бидејќи доколку не успеете во тоа може лесно да се разочарате.
Не заборавајте на здравјето на коските
Ова можеби не ви се чини како вообичаена цел којашто секоја жена би си ја поставила за исполнување во Новата година, но е клучна за жените и девојките од сите возрасти. Многу жени сметаат дека не мора да се грижат за здравјето на своите коски и речиси забораваат на нив. Напротив, грижата за коските е многу важна на секоја возраст и следењето на внесот на калциумот преку исхраната е, исто така, важно бидејќи тоа е клучно здравјето на коските подоцна во животот. Остеопорозата е главна закана за здравјето на жените. Се смета дека една од секои две жени постари на возраст околу 50 години ќе има фрактура поврзана со остеопороза во нејзиниот живот.
Бидете свесни дека одредени видови храна и лекови можат да придонесат за ослабување на коските. Многу истражувања покажуваат дека газираните пијалаци влијаат на намалувањето на коскената маса, како и дека никотинот може да го забави производството на коскени клетки и да предизвика побрзо губење на коскената маса.
Правете редовни прегледи
Некои тестови и прегледи се неопходни за одржување на женското здравје. Мамографијата е испитување коешто се користи за откривање на ракот на дојка. Оттука, се препорачува мамографијата да се изведува на секоја една или две години. Тестот за скрининг на остеопороза е, исто така, многу важен за здравјето на коските кај постарите жени, но и кај помладите жени или девојки со еден или повеќе фактори на ризик за заболување. Пап тестовите, кои се клучни за спречување на рак на грлото на матката, се препорачува да се прават во рок од три години од почетокот на сексуалната активност или на возраст од 21 година и да продолжат да се повторуваат најмалку на три години. Други важни области на скрининг за жените се крвниот притисок, холестеролот, дијабетесот, депресијата и сексуално преносливите болести.
Не заборавајте да правите редовни прегледи и тестови коишто несомнено ќе ви помогнат да живеете подолго и поздраво. Многу тестови придонесуваат за порано дијагностицирање на различни болести и заболувања што може да помогне во ефективноста на третманите за лечење на истите.
