Лекарите темелно можат да го проследат ракот на дојка, вклучително и кај оние кои немаат ни јасни симптоми!
Раното откривање на ракот на дојка е предуслов за навремено отпочнување со терапија и успешно лекување на болеста! Се поголем е процентот на дијагностицирани заболени лица од рак. Ракот на дојка е меѓу првите. На сите ни е познато дека колку порано туморот се открие, шансите за целосно излекување се поголеми!!! Со напредокот на медицината е овозможено сигурно и рано откривање, што доведува до поуспешен исход од самото лекување. Медицинските новитети секојдневно го доживуваат својот полн ек, а еден од новитетите е 3Д мамограмот, со цел подобро гледање на структурите на женската дојка. 3Д мамограмот се користи за откривање на рак на дојка кај жените со густо ткиво во дојките, како и за попрецизно откривање на абнормалностите во дојките.
Сме слушнале за 3Д органи со помош на 3Д принтер, но за 3Д мамограм?
3Д мамограмот користи Х-зраци за да создаде подобра слика на ткивото на дојката. Со негова помош, лекарите темелно можат да го проследат ракот на дојка, вклучително и кај оние кои немаат забележителни знаци, ни јасни симптоми!
Како што кажува и името, 3Д мамограм создава 3Д-слика на градите. Мамограмот испраќа слаби Х-зраци низ ткивото на дојката од различни агли. Потоа ги составува сите слики во една комплетна 3Д-слика. Конечната 3Д-слика дава целосен, детален впечаток на градите. Лекарите можат да го искористат ова за да детектираат било какви абнормални израстоци, односно рано да го откријат ракот. Постапката е многу слична на традиционалниот мамограм, но за разлика од него досега покажала за нијанса попрецизни слики. Досега не се објавени никакви абнормални ризици за негова употреба.
По што се разликува 3Д мамограмот од обичниот мамограм?
За време на 2Д мамограм, техничарот го компресира ткивото на дојката за да го направи што е можно подеднакво. Машината потоа создава едноставни слики на ткивото односно проекции, и тоа бочно од страните и од горе до долу. Во 3Д мамограмот, процесот е многу сличен, со тоа што техничарот зема повеќе слики од многу различни агли. Тие потоа ги собираат земените слики за да можат да создадат целосна слика, а со тоа ќе имаат поточна претстава за секоја можна структура на дојката.
Овој процес им овозможува на лекарите да разгледаат мали, индивидуални делови на ткивото на дојката кои можат да бидат тенки и до 1 милиметар!
Факт е дека 2Д мамограмите се уште претставуваат златен стандард за сликање на ткивото на дојка. Но многу здравствени установи и болници веќе ја користат 3Д технологијата заради појасната слика што ја дава на ткивото на дојката. Како што објавената студија во списанието за Клиничка Онкологија забележува, стапките на откривање на карцином се повисоки кај луѓето кои користеле 3Д слики.
Ова значи дека 3Д сликите „фаќаат“ повеќе знаци на карцином отколку 2Д сликите!
Користењето на 3Д мамограмот може да им даде на лекарите и на поединците поголема самодоверба и сигурност во дијагностицирањето и неопходното следење понатаму на текот на болеста.
