Оваа салата може да биде доволна за ручек, особено ако се стави и варената пченица, која јас ја изоставив, или некоја друга житарица, јачмен, на пример. може да се додаде краставица, пиперка, пржени печурки… јас сакам салати со варен наут, тој одлично оди и со цвекло и со рукола… ама оваа салата е посебна заради мешавината од зачини, заатр.
Заатр (или захтар) е име и за вид див тимијан и за средноисточната мешавина од мелен сумак, оригано, тимијан, тостиран сусам и сол. Мешавината заатр се користи во салати, за зачинување месо, зеленчук, јогурт, може да се послужи во мало тањирче покрај маслиново масло и многу е вкусно кога ќе потопите парче леб во маслиновото, па во заатр. Заатр и маслиново може да се намачка на лепче и пред печењето и тогаш ќе добиете либански man’oushe, јас направив такво лепче со тесто како за наанот, и го печев во рерна загреана на 200°C околу 8 – 9 минути.
Една од состојките на заатр е мелен сумак (или рус), зачин добиен со мелење на сувиот плод на сумакот. Има интересен киселкаст вкус, јас го ставам на печени компири, а кај нас го има на зелено пазарче.
Рецепт за заатр
- 4 лажици сусам;
- 4 лажици мелен сумак;
- 2 лажици сув тимијан;
- 1 лажица суво оригано;
- 1/2 лажиче мелен кумин (по желба);
- 1/2 лажиче сол.
Рецепт за салата од две порции:
- 2 – 3 лажици ладно цедено маслиново масло;
- 1/2 – 2/3 шоља наут;
- 1 модар патлиџан;
- 1 лажиче семе од коријандер;
- 1 лажиче мелен сумак;
- 1 голем патлиџан;
- Сок од половина лимон;
- 1 – 2 лажици заатр;
- Сирење, издробено.
Модриот патлиџан исечете го на коцки, прелијте го со 1 – 2 лажици маслиново масло, додајте сумак и коријандер, промешајте и печете го на 200°C околу 15 – 20 минути.
Исечете го патлиџанот на парчиња колку залак и помешајте го со останатите состојки.
Уживајте во вкусот!
* рецептите со во целост превземени од ситно сецкано
