Лекувањето на артериската хипертензија ја намалува инциденцата на срцев удар за 35-40%, акутен инфаркт на миокард за 20-25% и срцева инсуфициенција за повеќе од 50%
Хипертензијата или таканаречена тивок убиец, во почетокот нема симптоми сѐ додека не се развијат компликации, поради што од голема важност е неговото рано откривање и третман. Најчести симптоми на покачен крвен притисок се главоболка која е изразена наутро и зуење во ушите, потење, вознемиреност, ладни дланки и стапала и нарушување на сонот. Ова се дел од симптомите на непостојана хипертензија кои често се јавуваат кај млади луѓе. Тахикардија, епистакса и вртоглавица може да се појават кај повозрасни пациенти кои имаат постојана хипертензија. Доколку се појават компликации, може да дојде до отежнато дишење при напор, нервоза, мачнина, несоница, срцева дисфункција, болка во градите, главоболка, грчеви во мускули, полиурија и ноктурија. Резултатите од мета-анализи (големо рандомизирани, плацебо контролирани, двојно слепи студии) покажале дека намалувањето на крвниот притисок ја намалува инциденцата од фатални и нефатални кардиоваскуларни болести.
Лекувањето на артериската хипертензија ја намалува инциденцата на срцев удар за 35-40 %, акутен инфаркт на миокард за 20-25 % и срцева инсуфициенција за повеќе од 50 %. Основна цел при лекување на артериска хипертензија е максимално долгорочно намалување на вкупниот кардиоваскуларен ризик. Тоа подразбира намалување на крвниот притисок, како и контролирање на сите ризични фактори.
Зголемениот крвен притисок се карактеризира со систолен крвен притисок над 140mmHg и дијастолен над 90mmHg. Правилно мерење и интерпретација на вредностите се од клучно значење за поставување на дијагнозата и почнување на соодветна терапија. За ефикасноста на терапијата пресудни се вредностите пред почнување на терапијата. За поставување на дијагнозата потребно е да се направат повеќе мерења во повеќе временски интервали. И определени фактори влијаат на вредностите на крвниот притисок и затоа треба да се избегнуваат 60 минути пред мерење. Тука спаѓаат храната, внесување кофеин, пушење и напорни физички вежби. При мерењето, пациентот треба да биде опуштен, навален со раката потпрена на цврста подлога. Крвниот притисок се мери на двете раце, а се бележи поголемиот.
Д-р Миланчо Пејов, специјалист кардиолог
