Еден од најбогатите луѓе на светот сака да го спаси човештвото од болести
Основачот на социјалната мрежа Facebook, Марк Зукерберг, заедно со својата сопруга, педијатарот Присила Чен, сакаат да ги излечат сите болести што постојат. Освен нивната желба, тие својата мисија ја започнаа со вложување на три милијарди долари за формирање на иницијативата „Чен Зукерберг“ (CZI).
Целта е да се пронајде лек за сите болести, до крајот на 21 век. Главен фокус на иницијативата е вложување во долгорочни обемни научни истражувања од коишто не се очекуваат резултати во скоро време.
Дел од иницијативата е Чен Зукерберг биохаб, организација за медицински истражувања којашто својата работа ја започна со 50 милиони долари за финансирање на истражувачи. Овие парични средства се наменети за 47 научници (се пријавиле повеќе од 700) за поддржување на нивните истражувања во наредните години, со што секој од нив добива еден и пол милион долари. Нивната работа опфаќа повеќе области: од обработување на клетки, развивање на технологијата на биочипови и истражување за маларија. Биохаб соработува и со три универзитети: Беркли, УЦФ и Стенфорд, коишто ќе бидат составен дел од работата на овие истражувања.
„Спроведуваме истражувања коишто ќе помогнат при решавање на големи здравствени проблеми. Ги најдовме и ги поддржуваме најдобрите биолози, научници, инженери и технолози. Сакаме да промовираме интелектуална слобода и соработка“, соопштуваат од Чен Зукерберг биохаб и додаваат дека користат најнови научни алатки и доколку вистинската алатка којашто треба да реши некој проблем, не постои, тие ќе ја измислат.
