Крекери со тиква – здрави грицки за ладните есенски денови
Вкусен и лесен рецепт за крекери со тиква, посипани со разни крцкави додатоци. Вкусни се со гвакамоле, хумус, сос од грав или пинџур, а и сами. Овој рецепт уште еднаш докажува колку е корисен и прилагодлив еден од најубавите есенски плодови – тиквата. Во крекерите може да додадете многу нешта, бидете креативни и уживајте во здрави грицки.
- 1 ½ шолја рендан кашкавал:
- 4 лажици путер, ладен;
- ½ шолја пире од тиква;
- ½ шолја интегрално пченично брашно;
- ¼ шолја интегрално ‘ржано брашно;
- 2 лажички кафеав шеќер;
- 2 лажички заатр;
- 1 лажиче црвен пипер;
- 2 – 3 суви лути чили пиперки, издробени;
- ½ лажиче сол;
- 1 лажица кефир (или јогурт, павлака, млеко).
За посипување користете: Сончоглед, измешан со малку маџун и малку соја сос, крупна сол, чиа, ленено семе, сусам, афион и црвен бибер.
Ставете ги сите состојки во машина за сецкање, освен кефирот, и измешајте ги. Додајте го кефирот и повторно измешајте ги додека не се спојат. Сето ова може да се направи и со рака, ама во сецко е многу побрзо. На побрашнета површина исукајте го тестото на дебелина отприлика 3 мм и исечете го на квадрати од 2 – 3 см. Префрлете ги квадратчињата во големо тавче врз хартија за печење и на секое ставете му нешто крцкаво: сусам, ленено семе, сончоглед, чиа, црвен бибер, афион или сол.
Печете ги крекерите во рерна загреана на 175°C околу 12 – 15 минути.
* рецептите со во целост преземени од ситно сецкано
