Доволна само една чинија во која имате сé, па можете да си седнете и во фотеља, наместо на маса
Еден од омилените ручеци на многумина се брзо пржени зеленчуци во вок тава, со или без месо, со ориз, или обратната варијанта, пржен ориз со зеленчуци, со или без месо. И двете се прават многу брзо и може да се употребат разни зеленчуци. Кај ова јадење добрата работа е дека ви е доволна само една чинија во која имате сé, па можете да си седнете и во фотеља, наместо на маса.
Не е задолжително да се придржувате до количините на состојките.
Употребете тоа што имате. Добро е состојките да бидат исецкани пред да почнете, затоа што готвењето брзо оди; а оризот е убаво да биде сварен претходниот ден, во фрижидер таман ќе се исуши, ама и тоа можете да го прескокнете ако не сте испланирале на време.
- сончогледово масло;
- 2 – 3 млади кромитчиња
- 2 пилешки бели меса, без коска и без кожа;
- 2 – 3 чешниња лукче;
- 1 голем морков;
- ½ тиквица;
- гранчиња од брокули;
- 2 јајца;
- 2 – 3 лажици соја сос;
- сол по вкус, бибер;
- сусамово масло, (ако имате)
- друго што добро оди во ова јадење: пиперки, младо лукче, зелка, сланина, печурки, свеж ѓумбир, грашок…
Сварете го оризот. Загрејте го маслото во вок тава на јако и прво ставете го младото кромитче да се пржи, а брзо потоа и пилешкото исечено на коцки и посипано со сол. Оставете неколку зелени перки од кромитчето за посипување на готовото јадење. Намалете ја темпертурата ако е многу јака и кромидот гори. Пржете го пилешкото со постојано мешање додека не е испржено од сите страни, потоа додајте ги морковите, лукчето, брокулите и тиквиците и пржете го сето тоа кратко.
Додајте го оризот, промешајте сé убаво, па тргнете го оризот со зеленчуците и месото на една страна во тавчето, и тука испржете ги двете изматени јајца. Потоа измешајте сè заедно со јајцата, додајте соја сос, уште сол ако треба, свежо мелен црн бибер и малку сусамово масло, ако имате. Сусамовото масло додава многу интересен вкус, ама ставете прво многу малку, бидејќи е јако и не му се допаѓа секому. Ние го јадевме оризот со набрзина направено чили масло. Измешан лут буковец со ладно цедено маслиново масло.
* рецептите со во целост преземени од ситно сецкано
