Зрачењето од мобилните телефони е една од најголемите опасности по здравјето на децатa бидејќи нивниот нервен систем сè уште се развива
Напредокот на технологијата и мобилните телефони без сомнение го олеснуваат нашиот секојдневен живот. Начините на кои остваруваме контакт и комуницираме со семејството, пријателите и колегите, денеска се многу поинакви и истовремено поедноставни и попрактични од оние во минатото.
Во сферата на мобилната индустрија денеска непрекинато се воведуваат технолошки новитети што ќе се усовршуваат и во иднина, со цел секојдневно подобрување на начинот на комуникација помеѓу луѓето. Но, кога станува збор за децата од предучилишна и училишна возраст, како и тинејџерите, мобилната индустрија претставува „меч со две острици“. Точно е дека мобилниот телефон е нужен уред за комуникација што обезбедува брз и ефективен контакт со родителите и наставниците во ситуации коишто би можеле да бидат потенцијална опасност за детето.
Но што се случува кога мобилниот телефон станува повеќе од уред за комуникација и ја презема контролата врз развојот и здравјето на децата?
Како мобилните телефони влијаат на децата
Младите на денешницата се првата генерација што може да „ужива“ во мобилната комуникација во секое време и на секое место. Но токму ова може да влијае негативно на децата, нивното однесување и гледање на секојдневието.
Денес, седум од десет деца без разлика дали на предучилишна или на училишна возраст имаат мобилен телефон што постојано го користат.
Она што е загрижувачки е влијанието на мобилните уреди на социјалниот и општествен живот на овие деца. За многумина од нив мобилниот телефон е предмет што им овозможува подобро да се вклопат во средината што ги опкружува, односно во друштвото на своите врсници, што им влева поголема самодоверба и сигурност. Подоцна мобилниот телефон, односно постојаното телефонирање и испраќање пораки може да стане прекумерно. Едно истражување спроведено од Centre for Science Education на универзитетот во Шефилд, докажува дека 90% од пораките што секојдневно биле испратени и примени биле од деца, од кои 16% праќале дури до 10 или повеќе пораки во еден ден.
Влијанието на мобилните телефони на социјалниот и општествен развој на децата
Мобилните телефони денеска вообичаено ги „хранат“ личните потреби кај тинејџерите – тие им овозможуваат да се вклопат во средината и да стекнат популарност помеѓу своите врсници со кои комуникацијата е постојана. Кај некои деца мобилниот телефон ја задоволува и желбата за внимание, како и емотивниот порив, а кај други желбата за добар материјален статус. Сите овие нешта моментално може да ја зголемат самодовербата кај децата, но тоа може многу брзо да се промени и да предизвика спротивен ефект што ќе се одрази негативно на нивниот социјален и општествен развој.
Влијанието на мобилните телефони на здравјето и безбедноста на децата
Зрачењето од мобилните телефони е една од најголемите опасности по здравјето на децата. Се смета дека здравјето на децата е многу поранливо од зрачењето од мобилните телефони, отколку на возрасните, бидејќи главата и нервниот систем сè уште се развиваат во раните тинејџерски години.
Оттука, експертите препорачуваат децата под 16 години да го користат телефонот само во приоритетни ситуации и да избегнуваат долго играње игри или често испраќање пораки.
Досега многу земји во светот започнаа со преземање важни иницијативи за покревање на свеста за штетноста на мобилните телефони на здравјето на децата. Владата во Франција презема чекори за промена на законите за заштита на децата што влучуваат забрана за користење на мобилните телефони во училиштата, а владината агенција Radiation and Nuclear Power Authority во Финска, пак, реагираше на загриженоста на безбројните научници и невролози во светот и ги советуваше родителите да преземат мерки на претпазливост.
Совети при купување на мобилен телефон за детето
Родители, доколку размислувате да му купите мобилен телефон на вашето дете, обидете се да поставите граници и правила што би ви помогнале уште на самиот почеток да му објасните на вашето дете за правилната употреба на мобилниот телефон:
- одредете висина на средства за јавувања и праќање пораки;
- објаснете му различни приоритетни ситуации кога би требало да ве контактира;
- објаснете му на што треба да внимава и за што да не го користи телефонот;
- одредете број часови во денот може да го користи телефонот за играње;
- потенцирајте му каде треба да го чува телефонот;
- потенцирајте му да не го дава својот број на непознати личности.
