Според Светската здравствена организација, еден од секои шест смртни случаи во светот, се должат на ракот, што го прави сериозен глобален проблем.
Истражувачи од Универзитетот Џонс Хопкинс соопштија дека ја откриле клучната причина што се крие зад една од најопасните особини на ракот – метастазата. Со проучување и разбирање како функционираат метастазите, нивната студија претставува нови можности за спречување на ширењето на ракот во организмот.
Лекувањето на ракот може да биде деликатно, бидејќи, на пример, клетките на ракот имаат тенденција да се шират брзо, односно да метастазираат, процес што понекогаш се случува да остане незабележан. Според Светската здравствена организација, еден од секои шест смртни случаи во светот, се должат на ракот, што го прави сериозен глобален проблем. Околу 90 отсто од тие смртни случаи се јавуваат кога ракот веќе метастазирал.
Но што ако ширењето на клетките на ракот може да се спречи? Ова е идејата зад една студија на тимот истражувачи од Универзитетот Џонс Хопкинс објавена во неодамнешното издание на списанието „Nature Communications“.
Истражувачите заклучиле дека решението е разбирање на она што го предизвикува метастатското однесување, како и откриле дека клеточната густина е многу важна во создавањето на метастазите.
„Откривме дека проблемот не е вкупната големина на примарниот тумор што предизвикува клетките на ракот да се шират, туку колку цврсто тие клетки се споени меѓусебно кога се одделуваат од туморот“, вели водечкиот автор на студијата Хасини Јајатилака во соопштението.
Пред оваа студија, заедничкиот поглед на метастазите беше дека тие се случуваат како резултат на растот на туморот. Тимот истражувачи ги проучувал туморските клетки во три-димензионална средина имитирајќи човечки ткива и открил дека густината во клетките на ракот е она што предизвикува метастази. Тие, исто така, ги откриле протеините интерлеукин 6 (ИЛ-6) и интерлеукин 8 (ИЛ-8) што предизвикуваат клетките на ракот да се шират.
„Со овој пронајдок бевме во можност да развиеме уникатен терапевтски лек што директно ќе ги таргетира метастазите, а не растот на примарниот тумор. Овој третман има потенцијал да го спречи метастазирањето, а со тоа и да ги подобри резултатите кај пациентите со рак“, изјави Денис Виртц во соопштението.
Мухамед Заман, професор на Универзитетот во Бостон, вели дека оваа студија и резултатите и пронајдоците од истата се многу важни за борбата против ракот. Тој изјави дека студијата дава многу специфична цел во создавањето на лекови против рак.
Истражувачите, сепак, потенцираат дека еден единствен лек или терапија не би биле од голема корист во борбата против ракот и метастазите. Тие сметаат дека ќе бидат потребни комбинации од лекови и различни третмани што ќе ги таргетираат метастазите заедно со имунолошкиот систем за да може ракот вистински да се победи.
