Прес-конференција по повод одбележувањето на Европската недела за превенција од рак на грлото на матката
Последната недела од јануари е Европска недела за превенција на ракот на грлото на матката. Со таа цел, здружението БОРКА – за секој нов ден, Здружението за ХПВ на Р. Македонија и Македонското здружение за цервикална и патолошка колпоскопија, ќе одржат прес-конференција по повод одбележувањето на Европската недела за превенција од рак на грло на матка (22-28 јануари) 2017 година.
Прес-конференцијата ќе се одржи денес, 25 јануари (среда) 2017 година, со почеток во 12 часот, во ЕУ ИНФО ЦЕНТАР, ул.Св.Кирил и Методиј бр. 52-б, Скопје.
На настанот, свои обраќања ќе имаат г-ѓа Биба Додева, претседател на Здружението „БОРКА – за секој нов ден“, доц. д-р Горан Димитров, спец. гинеколог акушер, претседател на ЗХПВМ и Македонско Лекарско Друштво и проф. д-р Јорго Бабушку, субспец. по гинеколошка оперативна онкологија, претседател на Македонското здружение за цервикална и патолошка колпоскопија.
Ракот на грлото на матката е второ по зачестеност малигно заболување и втора причина за смрт од рак кај жените, после ракот на дојка. На светско ниво, годишно се регистрираат околу 500 000 нови случаи, од кои дури 300 000 завршуваат со смрт. Основната превенција се остварува преку редовни гинеколошки прегледи, редовни ПАП тестови и ХПВ вакцинација.
Обновено:
Претседателката на Здружението „БОРКА-за секој нов ден“ Биба Додева на денешната прес – конференција рече дека во Македонија ракот на грлото на матката е на четврто место од сите видови рак по честота, а кај жените е на второ место по ракот на дојката.
– Во Македонија секоја година од рак на грло на матка заболуваат околу 200 до 250 жени, а приближно половина од нив умираат како последица на оваа болест, рече таа.
Република Македонија, како што додаде, е една од државите која ги следи светските и европските искуства и од 2012 година започна со организиран скрининг на рак на грлото на матката.
Посочи дека според искуствата од терен бројот на новозаболени жени од овој вид карцином е поголем во руралните средини затоа што тие не се доволно инфомирани.
Притоа упати апел до девојките и жените да сторат се за да се превенираат од рак на грлото на матката, преку редовни гинеколошки прегледи, ПАП тестови, одговорно сексуално однесување со сите мерки за заштита од полово преносливи болести и преку редовната програма за вакцинација против ХПВ вирусите.
Во светски размери годишно се регистрираат околу 530 илјади нови случаи на заболени од рак на грлото на матката, од кои дури 300 илјади завршуваат со смрт.
Претседателот на Здружението за ХПВ на Македонија, д-р Горан Димитров нагласи дека за жал се повеќе помлади заболуваат од рак на јајници и, како што додаде, забележани се пациентки помлади од 25 години.
Димитров напомена дека од високоризничните ХПВ типови се сметаат како главен фактор во настанувањето на ракот на грлото на матката, па поради тоа е битно вакцинираните девојчиња и жени да продолжат со редовни гиниколошки прегледи и одговорно сексуално однесување.
