dali-zhenskite-srca-se-pochuvstvitelni-na-stres_image
Споделете со пријателите!

Кога жените се под психолошки стрес тие имаат тенденција да ги стегаат своите крвни садови.
Минати истражувања покажале дека како резултат на менталниот стрес жените со срцеви заболувања имаат поголема веројатност да страдаат од миокардна исхемија во споредба со мажите. Ова заболување се однесува на намалување на протокот на крв во срцето што може да го зголеми ризикот од срцеви компликации.

„Менталниот стрес може да предизвика оштетување на крвните садови.“

Нова научна студија открива дека менталниот стрес може да предизвика оштетување на крвните садови, а жените со срцеви заболувања може да бидат особено ранливи на тоа. Истражувачите што го водеа истражувањето ја откриваат причината поради која жените, за разлика од мажите, се посклони за заболување од миокардна исхемија. Тие потенцираат дека причината за ова е тоа што кога жените се под психолошки стрес имаат тенденција да ги стегаат своите крвни садови.

Студијата вклучила 678 лица со коронарна артериска болест, којашто предизвикува плаките да растат во поголеми артерии, што се манифестира со симптоми како болка во градите и недостаток на воздух. Исто така, може да доведе до срцев удар ако плаката пукне и целосно ја блокира артеријата.

Секој од учесниците во студијата поминал низ ментален стрес тест – јавно говорење, за време на кој истражувачите ја следеле работата на нивните срца за да видат дали тој предизвикува миокардна исхемија. Вкупно околу 15 отсто од сите учесници во истражувањето имале миокардна исхемија, поттикната од ментален стрес. Иако стапката на појава на исхемијата била слична кај мажите и жените, основните причини поради кои се појавила се разликувала меѓу половите.

Прочитајте:  Извори на протеини освен месо

Кај жените таа главно била предизвикана од стегање на малите крвни садови, додека кај мажите поради менталниот стрес што предизвикал пораст на крвниот притисок и срцевиот ритам, што ја зголемило оптовареноста на срцето.

„Традиционално, лекарите се фокусираа на тоа колку добро срцето и крвните садови реагираат на физичкиот стрес. Но не можеме да го игнорираме проблемот со менталниот стрес во лекувањето на срцевите заболувања. И тоа подигнување на свесноста може да биде особено важно за жените“, потенцираше д-р Нике Голдберг, портпарол на Американската асоцијација за срце.

Не постои единствено решение за справување со стресот. За некои луѓе, истакна таа, дневна прошетка или обична техника за релаксација може да биде доволна. За други, пак, можеби ќе треба упатување до професионалец за ментално здравје.

Познато е дека жените почесто од мажите имаат микроваскуларна дисфункција. Тоа се однесува на проблеми во малите крвни садови кои го хранат срцето. Овие артерии не се затнати со плаки, но имаат оштетување што може да го наруши протокот на крв. Според Голдберг, таа повисока стапка на микроваскуларна дисфункција може да помогне да се објасни зошто жените се повеќе склони кон стегање на крвните садови кога се под стрес.

Сепак, не е јасно дали стресот може да предизвика слично стегање на крвните садови кај жените без заболување на срцето. И истражувачите не знаат дали краткорочните реакции на стрес кај овие учесници во студијата би можеле да го зголемат ризикот од срцев удар или други компликации. Тие потенцираат дека планираат да го разгледаат тоа во идните студии.


Споделете со пријателите!