Летото е вистинско време за дружби на отворено. Полни чинии храна и ладни пијалаци се дел од декорот, но исто така е поголема веројатноста да завршите со несакано гарнирче од труење со храна.
Огромен број на луѓе во текот на летото добиваат болест што се пренесува преку храна. И кога ќе дојде летото, инфекциите што произлегуваат од салмонела, листерија и многу други патогени кои најчесто се одговорни за контаминација на храната го достигнуваат својот врв. Всушност, болестите што се пренесуваат преку храна се 10 пати почести од јули до септември отколку во зимските месеци.
Па зошто храната станува поризична за јадење во лето и што е поважно, како можете да се заштитите? Еве што треба да знаете.
Идеални услови за опасни патогени
Болести предизвикани од храна може да се појават кога јадете храна контаминирана со бактерии или други патогени, што доведува до симптоми како гадење и дијареја кои можат да варираат во нивната сериозност. Некои бактерии имаат тенденција да бидат попроблематични во лето бидејќи им годи топлото време и им помага да се размножуваат.
Ризичните навики за готвење стануваат почести
Не само тоа, туку начинот на кој ја подготвуваме храната често станува поризичен во текот на летото, бидејќи повеќе луѓе се движат на отворено за да јадат и да се дружат. Ова дополнително ги зголемува шансите за изложеност на опасни бактерии.
Добрата вест е дека сè уште можете да уживате во придобивките од потоплите месеци и да останете безбедни.
Еве некои вообичаени грешки во готвењето во лето и што да правите наместо тоа.
Нецелосно готвење на храната
Проблем: Секој сака добра летна скара, но храната на скара честопати не е соодветно зготвена, затоа што однадвор месото може да биде запечено, но внатре може да биде сурово или недоволно зготвено, што доведува до поголема веројатност за заболување.
Решение: За да спречите болести што се пренесуваат преку храна, гответе ја храната на безбедна внатрешна температура, која може да варира во зависност од типот на храната. Кога готвите на скара, можете да користите термометар за храна за да ја измерите внатрешната температура на месото.
Чување храна во „опасна зона“
Проблем: Во лето, чувањето храна на отворено на настани како пикници и скари го отежнува обезбедувањето дека храната е соодветно загреан. Но, бактериите во храната што е на температура помеѓу 4 и 60°C, наречена уште и „Опасна зона“, се размножуваат брзо.
Решение: За да ја држите храната надвор од опасната зона, најлесно е кога би се држеле до правилото „држите ја ладна храна ладна, а топла храна топла“. Можете да го одржувате зготвеното месо топло со тоа што ќе го ставите на страна од решетката за скара или ќе го ставите во топла рерна или на плех за загревање. Од друга страна, чувајте ја ладната храна како овошје, зеленчук и сирење ладна во фрижидер или кутија за мраз додека не се сервира, а потоа ставете ги садовите во чинии со мраз ако организирате шведска маса. Правило? Фрлете ја секоја храна што е оставена надвор повеќе од еден час кога надвор е најмалку 30°C.
Опуштени во врска со хигиената
Проблем: Поверојатно е да јадеме на отворено во лето, што значи дека сме и помалку склони да преземаме соодветни санитарни мерки. Надворешните површини можеби не се чистат толку редовно како кујнските површини, создавајќи можности за контаминација. Исто така, е поголема веројатноста да ја занемарите личната хигиена на групни собири на отворено.
Решение: Темелно измијте ги и исплакнете ги сите прибори, даски за сечење и опрема, особено по контакт со сурово месо и живина. Истото важи и за вашите раце. Препорачливо е миење најмалку 20 секунди со сапун и вода или користење средство за дезинфекција на раце или крпи со најмалку 60% алкохол ако немате чешма во близина.
За да спречите вкрстена контаминација, чувајте ја суровата и готовата храна одделно. Чувајте ги одделно во фрижидер, со готовата храна одозгора, и секогаш држете ги покриени додека се во фрижидер. Кога готвите, имајте посебна даска за сечење за сирово месо и живина.
Симптоми и третман
Дури и ако преземете мерки на претпазливост, не можете секогаш да избегнете труење со храна. Некои од најчестите симптоми на заболувања предизвикани од храна се:
- Дијареја
- Стомачни грчеви
- Гадење
- Повраќање
- Треска
Симптомите можат да траат од неколку часа до неколку дена. Додека луѓето генерално имаат благи симптоми, одредени групи се поризични во однос на труење со храна:
- Лица над 65 години
- Деца под 5 години
- Лица со ослабен имунолошки систем
- Бремени лица
Ако знаете или мислите дека имате труење со храна, најдоброто нешто што можете да го направите е да останете хидрирани со пиење течности што содржат и вода и електролити, како што се бистар сок од јаболко или бистра супа.
Побарајте медицинска помош ако не можете да ги задржите течностите поради повраќање, имате вртоглавица, не мокрите, имате висока температура или сè уште сте болни по два до три дена.
