horoskop-51-nedela
Споделете со пријателите!

Хороскоп за 51ва недела: Прочитајте за однесувањето и навиките во исхраната на хороскопските знаци за време на домашни слави и празнично расположение. Лавот и Бикот ќе бидат главни и задолжени за добра атмосфера, Шкорпијата и Вагата ќе наоѓаат забелешки околу поставувањето на трпезата, а Близнакот несебично ќе се расфрла со својот шарм.

.

Овен

Бидејќи сте знак кој што се одликува со голема енергија, потребно ви е гориво за неа. Вашата нестрпливост ќе ве натера да пробате сè што се наоѓа пред вас на празничната трпеза. Симптомите на настинка што ќе ги почувствувате и ќе ги игнорирате, се реакција од провевот што се создава во вашата глава како производ на вашите избрзани реакции.

 

Бик

Вие сте хедонистички богови, главни ѕвезди во секое друштво. Од убавините на асталот, ќе доживувате астрални проекции, одново и одново. Физичката болка која што ќе ја искусите, сепак ќе биде душевна и реакција на кратерот што ќе се појави во вашиот буџет за време на празниците. Среќата е во луксузот, а луксузот во удобноста. Затоа, вежбањето ќе ви биде далечен поим, подеднакво апстрактен како и вашата физичка виткост.

 

Близнаци

Омилени на секоја забава, вам не ви е важно дали сте на роденден, домашна слава или новогодишна прослава, сè додека им овозможувате на оние околу вас премиерна проекција на најновата модна колекција оплеменета со совршените пропорции на вашата фигура. Вие сте великодушни и дарежливи, па вашиот шарм несебично го користите за другите да се чувствуваат посебно бидејќи се во ваше друштво. Периодов очекувајте да изгубите еден до два килограми од претераното смеење со сила.

 

Рак

Ќе посакате да вежбате, но при секој обид ќе ви се истура домашното црвено вино. Амбициите за физичка активност ќе ги складирате во мистичниот простор наречен „утре“, во кој се наоѓа целата мотивација, заедно со желбата и волјата за здрав животен стил. Исто така, периодов особено ќе внимавате на храната, што значи дека вешто и промислено ќе ја криете од другите. 

 

Лав

Вие царувате во домот и секогаш сте главни. Ги сакате домашните слави, особено својата, бидејќи тогаш сте во центарот на вниманието. Големи фалбаџиски зборови и големи залаци се вашата лавовска комбинација. Очекувајте проблеми со спиењето бидејќи спиењето на стомак едноставно нема да биде опција за вас.

 

Девица

Трудот да бидете спонтани, никако да вроди со плод. Но вие и така не го сакате полесниот начин. Исто така, не сакате ни лесни рецепти, и токму затоа нема подобар домаќин од вас. За атмосфера и добро расположение, напомош ќе ги викнете Биковите и цело време ќе седите на работ на столицата, подготвени да го забришете виното што тие ќе го истурат додека занесено пеат.

 

Вага

Вашата нерешителност ќе ве направи вреден домаќин. Бидејќи никако нема да можете да се одлучите за празничното мени, ќе подготвите најразлични јадења и десерти. И покрај тоа што десертите се вашиот омилен домен, сепак не сте на Исланд да правите десет торти. Три се доволни. Или пак четири? На гости ќе одите најадени од дома, бидејќи неправилната форма на кифличките ќе ве натера да го изгубите апетитот.

 

Шкорпија

Вие сте опкружени со мал круг на луѓе не дека навистина така сакате, туку дека другите така избрале. Сепак, вам ви одговара да се истакнувате, па и по цена тоа да значи сами на врвот. На вашата домашна слава или празнична прослава, гостите збунето ќе се прашуваат на кој начин се јадат јапонските и тајландските специјалитети, а вие со задоволство ќе демонстрирате. Одењето на гости ќе ви создава мачнини, поттикнати од тие обични традиционални посни сарми.

 

Стрелец

Вие искрено ќе им кажете на домаќините дека на Марс има подобра атмосфера отколку на нивната забава, а вашиот пријател Близнак ќе се потруди да ја камуфлира тишината со шеги проследени со претерано смеење. Оваа недела ќе имате зголемени болки во стапалата, бидејќи вашиот нескротлив дух ќе ве направи главни на подиумот за играње.

 

Јарец

Сте прочитале дека имунитетот се зајакнува со смеење, па одите наоколу со совршено наштимана насмевка. Трудот ќе ви се исплати, бидејќи периодов ќе доминира позитивната страна на вашата изразена дуалност. Близнаците со својата несериозност ќе ви предизвикуваат мигрени, а Биковите ќе избегнуваат да наздравуваат со вас бидејќи на прославата пиете смути. Вашето трезвено однесување едноставно го навредува нивниот хедонизам.

 

Водолија

Светот живее во духот на вашиот знак, бидејќи ова е ера на Водолиите. Физичката слабост ќе ја сокриете со вашата ментална сила. Заради неа, успешно ќе ловите обожаватели секаде каде што ќе се појавите. Вашиот интелигентен хумор нема да го сфаќаат Јарците, па затоа можно е да почувствувате ненадејни болки од грбот. Тоа ќе бидат нивните рогови. Проблемот ќе го решите со тоа што ќе им посветите малку внимание.

 

Риби

Вие сте убедени дека треба да има филмска музика кога се движите, бидејќи не е можно да бидете незначајни и обични. Вие сте родени славни и вам не ви треба слава, бидејќи секој ден се славите самите себе. Оваа недела, вашата посесивност ќе се одрази врз храната, што значи дека ќе складирате храна како верверица. Имајте на ум дека сепак не сте шумско животно и пијте тоа што најмногу ви одговара – вода.

Прочитајте:  Каков шарм има секој од Хороскопските знаци?

Споделете со пријателите!