Дали купивте велосипед? Планирате ли? Прочитајте неколку практични совети пред да се подновите
Длабочината на џебот и што сакаме да добиеме како можност најмногу го стеснуваат изборот при пазарење велосипед.
Денешните велосипеди се многу полесни за возење. Лесни, со значително поцврсти рамови, мазни и прецизни менувачи, цврсти и сигурни кочници… Овие карактеристики ги чинат велосипедите едноставни за користење, а истовремено мошне ефикасни возила. И ако земеме во предвид од колку малку делови се составени, цената и го надополниме со уживањето при возењето, тогаш купувањето велосипед е одлична работа.
Има многу видови на велосипеди, од вечно популарните “маунтајн бајк” до тенките и елегантни велосипеди што сме ги гледале на олимписките велодроми и меѓу нив еден куп други, БМХ, туринг, транспортни, тркачки, што како почетници сигурно би не довело во дилема кој е правиот велосипед за нас?
Во повеќето продавници за велосипеди најчесто ги има овие видови на велосипеди.
Теренски велосипед. Познат како mountain bike или планински. Овој модел е џип меѓу велосипедите. Идеален е за рекреација и возење вон асфалт – off-road, по ридести терени. Се одликува со цврст и издржлив рам, моќни кочници, дебели и робусни гуми, кои ја намалуваат можноста да ви се дупне гума или да ви се искриви фелната, како и прави рачки за управување. Има поголем избор на брзини, поготово на ниските што е огромна предност по нагорни и нерамни терени. Некои велосипеди од овој тип доаѓаат и со суспензија што значи апсорбцијата на удари е уште поголема. Овие велосипеди не се наменети за брзи и возење на долги дистанци.
Друмски велосипед. Овие велосипеди се со лесни рамови што значи секое вртење на педалата се претвара во движечка сила. Гумите се тенки, триењето со асфалтот е многу помало, рачките за управување искривени во вид на рогови што при возењето седиме во аеродинамична положба и управувањето е брзо и ефикасно. Одлични перформанси за искачување оп нагорнини (асфалтирани). Едноставно, идеален е за брзо возење, тренинг и фитнес. Недостаток кај овој тип е што начинот на седење е во наведната положба и е препорачлив за луѓе кои имаат пофлексибилни тела.
Хибриден велосипед. Самото име го издава овој тип на велосипеди и е комбинација на предходните два типа, а примарна намена е теренско возење. Имаат цврсти рамови како теренските со тркала и гуми за асфалт и се со прави рачки за управување со што седечката положба е исправена и поудобна.
Големината на велосипедот е многу важна како за удобност така и за безбедност при возењето. Доколку не ни е „точен“ велосипедот може да почувствуваме болки во грбот, задникот и нозете. Правилна позиција е кога не сме истегнати при држење на рачките за управување и кога вртиме со нозете при најдолната позиција на педалата, коленото треба да е многу малку свиткано. Доколку со двете нозе допираме на тлото при седење тогаш тој велосипед е мал за нас или седиштето е премногу спуштено.
Цената на велосипедите е во опсег од 50 евра до 5000 евра и многу повеќе. Поевтините не се цврсти, долготрајни и безбедни како поскапите, затоа најдобар пазар е оној кој можеме да си го дозволиме. Со тоа што ќе платиме повеќе добиваме поцврст а полесен велосипед, попрецизен менувач, кочници и управувач, поголема удобност. Според поискусните, солиден велосипед тешко се наоѓа под 20000 ден.
Сепак најважно за почеток е да знаеме каде, колку и за што сакаме да возиме велосипед. Дали за фитнес, рекреација, за превоз, за забава, по каков терен би го возеле, колку повеќе знаеме што сакаме толку полесно и поефтино би поминале пазарејќи велосипед.
