Давењето е трета водечка причина за ненамерна смрт во светот
На глобално ниво, највисоките стапки на давење во вода се кај деца на возраст од 1 до 4 години, по што следат децата на возраст од 5 до 9 години.
Во регионот на Западен Тихи Океан, децата на возраст 5 до 14 години умираат почесто од давење отколку од која било друга причина, што значи смртните случаи од давење се поголеми од оние предизвикани од сообраќајни несреќи, леукемија, респираторни инфекции, епилепсија и сл.
Статистички факти за давењето во вода на глобално ниво
- Давењето е трета водечка причина за ненамерна смрт во светот;
- Околу 360 000 годишни смртни случаи заради давење во вода се регистирани во светот;
- Глобалните проценки може значително да го потценат реалниот јавен здравствен проблем поврзан со давењето;
- Давењето е процес на доживување на респираторно оштетување од потопување во вода.
Глобалниот извештај за давење од 2014 година, објавен од Светската здравствена организација, покажува дека возраста е еден од главните ризични фактори за давење во вода. Статистиките велат дека за секое давење на едно дете во вода, околу три други деца се хоспитализирани заради слични инциденти. Некои од овие резултираат со тешко оштетување на мозокот. Овие случаи често се поврзуваат со пропусти при надзорот на децата. Заради ова, целосниот и постојан надзор е клучен за одржување на безбедноста на децата околу водата.
Како да ја одржите безбедноста на децата покрај вода
Безбедноста на децата додека се околу или во водата најчесто зависи од возрасните. Кога не се внимава на децата додека пливаат или си играат покрај водата, ризикот од давење се зголемува. Тоа може да се случи брзо и тивко, без предупредувачки звуци.
Додека детето е покрај или во вода, многу е важно родителот секогаш да биде во негова близина и да го надгледува постојано, дури и откако ќе се научи да плива. Надзорот значи постојано визуелно надгледување и постојано одржување на близок физички контакт со детето. Ова значи дека родителот треба да е можност брзо да реагира во случај на немил настан.
Без разлика дали станува збор за базен, море, океан, па дури и семејната бања, неопходно е родителот постојано да следи и внимава што се случува, како и да биде во близина на своето дете. Надзорот не подразбира само повремено погледнување кон детето додека се извршуваат други задачи, туку постојано надгледување.
Кога одите со вашето дете на базен осигурајте се да се сместите подалеку од големиот базен за возрасни и да бидете што поблиску до малиот базен за деца каде што вашето дете ќе плива или ќе си игра. Бидете сигурни да му обезбедите заштитна опрема и внимателно следете ги неговите активности покрај и во базенот.
Децата не секогаш ги разбираат, применуваат или се сеќаваат на правилата, особено кога се заигруваат и забораваат на сè околу себе. Оттаму, добро оградена, безбедна област за играње може да биде ефикасна бариера помеѓу малите деца и опасноста од водата.
Доколку сте на плажа покрај езеро или море, поиграјте си заедно со детето и направете му ограден и безбеден простор за играње во ваша близина за да можете постојано да го надгледувате.
