Доколку не се третира навремено, хипотироидизмот може да го зголеми нивото на холестерол и создаде поголема веројатност за мозочен или срцев удар.
Тироидната жлезда е штитна жлезда со форма на пеперутка којашто се наоѓа во предниот дел на вратот. Таа произведува хормони коишто ја контролираат брзината на метаболизмот. Нарушувањата на тироидната жлезда, состојбите наречени хипотироидизам и хипертироидизам, предизвикуваат промени во производството на тироидни хормони што можат да го забават или забрзаат метаболизмот. Кога нивоата на хормоните стануваат многу ниски или многу високи, може да се почувствуваат широк спектар на симптоми. Во продолжение ги претставуваме најчестите симптоми што може да бидат знак за заболување на тироидната жлезда.
Чести симптоми што укажуваат на нарушување на тироидната жлезда
Зголемување или намалување на тежината
Неочекувана и необјаснета промена во телесната тежина е еден од најчестите знаци на нарушување на тироидната жлезда. Намалено производство на тироидни хормони, специфично за хипотироидизмот, може да предизвика зголемување на телесната тежина. Спротивно на ова, зголемено производство на тироидните хормони, специфично за хипертироидизмот може да предизвика намалување на телесната тежина.
Отекување на вратот
Отекувањето на вратот е видлив знак дека можеби нешто не е во ред со тироидната жлезда. Гушавост или отекување може да се појави и кај двете нарушувања на тироидната жлезда – хипотироидизам и хипертироидизам. Понекогаш, исто така, отокот во вратот може да биде индикација за рак тироидната жлезда или за тироидни нодули, грутки што растат во тироидната жлезда.
Промени во срцевиот пулс
Тироидните хормони влијаат на речиси секој орган во телото и можат да влијаат и на нормалната работа на срцето. Луѓето што боледуваат од хипотироидизам може да забележат дека срцевиот ритам им е побавен од вообичаеното. Хипертироидизмот, од друга страна, може да предизвика брзо срцебиење. Исто така, може да предизвика зголемен крвен притисок и чувство на треперење на срцето, како и други видови на срцеви палпитации.
Промени во расположението и енергијата
Нарушувањата на тироидната жлезда може да имаат значително влијание врз нивото на енергија и расположението. Луѓето со хипотироидизам честопати се чувствуваат уморни, слаби и депресивни. Оние пак со хипертироидизам многу често чувствуваат анксиозност, немир и раздразливост и имаат проблеми со спиењето.
Зголемена чувствителност на студено или топло
Промените во производството на тироидните хормони може да ја нарушат способноста за регулирање на телесната температура. Луѓето со хипотироидизам почесто чувствуваат студ, додека луѓето со хипертироидизмот вообичаено чувствуваат топлина којашто дополнително поттикнува прекумерно потење.
Кога да закажете преглед на тироидната жлезда?
Доколку забележите некои од претходно споменатите симптоми и се сомневате дека можеби имате проблем со тироидната жлезда, закажете преглед и направете ги потребните тестирања на тироидните хормони. Кај луѓето со историја на заболување на тироидната жлезда во кругот на семејството, ризикот за појава на некој тип нарушување е поголем. Оттука, препорачливо е да се прават почести проверки на тироидната жлезда.
Компликации кај нарушувањата на тироидната жлезда
Доколку не се третира навремено, хипотироидизмот може да го зголеми нивото на холестерол и создаде поголема веројатност за мозочен или срцев удар. Во потешки случаи, многу ниски нивоа на тироидни хормони можат да предизвикаат губење на свеста. Слично, нелекуваниот хипертироидизам може да предизвика сериозни проблеми со срцето и кршливост на коските.
