Денез започнува глобалната кампања на Светската здравствена организацијa: Хигиена на рацете
Чистете ги рацете и спречете го ширењето на бактериите отпорни на антибиотици! Без акција денес, нема да има лек утре. „СПАСЕТЕ ЖИВОТ, Чистете ги рацете“, гласи пораката на Глобалниот ден за хигиена на рацете, како дел од глобална кампања на СЗО.
Насекаде во светот, секојдневно умираат илјадници луѓе од инфекции стекнати за време на добивање на здравствена нега.
Хигиената на рацете е една од клучните стандардни мерки на внимателност. Повеќето интрахоспитални инфекции можат да се спречат со добра и правилна хигиена на рацете – чистење на рацете во вистинско време и на вистински начин. Секое ниво на подобрување на хигиената на рацете е поврзано со 24% намалување на ризикот од интрахоспитални инфекции.
Секој здравствен работник, како и секое лице кое е директно или индиректно вклучено во грижата за болните, мора да обрнува внимание на хигиената на рацете и правилно да ја практикува.
Република Македонија го одбележува Светскиот Ден за Хигиена на рацете од 2014 година и ги поврзува активностите за правилна хигиена на рацете со намалување на инфекциитево болниците и заедницата, намалување на употребата на антибиотици и со последователен ефект во намалување на натимикробната резистенција.
Оваа година се подготвени едукативни постери за правилна хигиена на рацете при различни медицински постапки. Постерите се дистрибуирани до сите болници во Република Македнија. Со следење на чекорите за хигиена на рацете при специфични медицински постапки ќе се овозможи намалување на болничките инфекции во Република Македонија.
