Светскиот ден на бубрегот оваа година се поклопува со Меѓународниот ден на жената поради што овогодишната кампања го носи симболичното име „Kidneys & Women’s Health“
Светскиот ден на бубрегот е глобален настан за подигнување на свеста за важноста на здравјео на бубрезите. Овој ден се одбележува преку организирање на многу настани и кампањи во сите делови од светот со цел да се подигне свеста за превентивното однесување, факторите на ризик и за тоа како да се живее со хронична бубрежна болест.
Светскиот ден на бубрегот секоја година се одржува на вториот вторник од месецот март. Оваа година се поклопува со Меѓународниот ден на жената поради што овогодишната кампања го носи симболичното име „Kidneys & Women’s Health“. Овој 8. март, Светскиот ден на бубрезите има за цел да нè поттикне да размислиме за важноста на здравјето на жените и особено за здравјето на бубрезите на жените.
Факти за хроничната бубрежна болест:
- 10% од населението во светот боледува од хронична бубрежна болест (ХББ), а милиони луѓе умираат секоја година, бидејќи не можат да си дозволат соодветен третман на болеста;
- Повеќе од 2 милиони луѓе ширум светот во моментов се подложени на дијализа или на трансплантација на бубрег;
- Се проценува дека бројот на случаи со бубрежна инсуфициенција ќе се зголеми диспропорционално во земјите во развој каде што бројот на стари лица се зголемува;
- Кај луѓето на возраст од 65 до 74 години ширум светот се проценува дека еден од пет мажи и една од четири жени боледуваат од ХББ;
- Незаразните болести (пр. срцеви заболувања, дијабетес или заболување на бубрезите) ги заменуваат заразните болести (пр. маларија и ХИВ/СИДА) како најчести причини за прерана смрт во светот.
Есенцијално е да се истакне дека хроничната болест на бубрезите е незаразна болест којашто може да се третира. Иако нејзината сериозност може да варира, ХББ е неизлечлива болест и предизвикува пациентот да има потреба од доживотна нега. Сепак со рана дијагноза и добар третман таа може да се забави или да се запре нејзината прогресивност.
Хроничната бубрежна болест кај жените
Хроничната бубрежна болест е светски здравствен проблем којшто се поврзува со предвремена смрт. ХББ се јавува кај околу 195 милиони жени ширум светот и во моментов е осма водечка причина за смрт кај жените која годишно брои приближно 600.000 смртни случаи.
Ризикот од развој на хроничната бубрежна болест е речиси подеднакво висок кај жените како кај мажите. Според некои студии, дури се смета дека ХББ е поверојатно да се развие кај жените во споредба со мажите со просечна 14% предоминација кај жените и 12% кај мажите.
Сепак бројот на жени со бубрежна инсуфициенција е помал од бројот на мажи. Кај жените почесто се јавуваат одредени видови болести на бубрезите, како што е лупус нефритис (болест на бубрезите предизвикани од автоимуна болест) и пиелонефритис (бубрежна инфекција). Болестите на бубрезите, исто така, се поврзани со бременоста: жените кои имаат ХББ се изложени на зголемен ризик за негативни последици во текот на бременоста и за мајката и за бебето.
Постои јасна потреба за повисока свесност, навремена дијагноза и правилно следење на хроничната бубрежна болест (ХББ) во бременоста. Од друга страна, важно е да се потенцира дека бременоста може да биде исто така важна за рана дијагноза на ХББ, што овозможува навремено планирање на неопходни третмани и интервенции за подобрување на состојбата.
Цели на Светскиот ден на бубрегот 2018
- Подигнување на свеста за здравјето на бубрезите;
- Поттикнување на скрининг на сите пациенти со дијабетес и хипертензија за ХББ;
- Поттикнување на превентивно однесување;
- Едуцирање на сите медицински професионалци за нивната клучна улога во откривањето и намалувањето на ризикот од ХББ, особено кај популации со висок ризик за заболување;
- Нагласување на важната улога на локалните и националните здравствени власти во контролата на ХББ епидемијата;
- Поттикнување на трансплантацијата како најдобро решение во случаите на откажување на бубрезите.
