Во светот бројот на заболени од астма изнесува 235 милиони и е често заболување кај децата
Дваесет и првиот век е означен како епидемија на алергиските болести и астмата, век во кој се достапни многу тераписки можности за оптимална и тотална контрола на болеста. Во светот бројот на заболени од астма изнесува 235 милиони и е често заболување кај децата.
И покрај постојаниот пораст на преваленцата на астмата во светот, истата може успешно да се дијагностицира и навремено лекува. Светскиот ден на астмата е годишен настан организиран од Глобалната иницијатива за астма – (GINA), со цел да се покрене свеста за астмата и нејзина превенција ширум светот. Светскиот ден на астмата за прв пат започнува да се одбележува како иницијатива започната во 1988 година од страна на GINA, организација која ги поставува медицинските основни упатства за контрола на болеста.
Астмата е хронична инфламаторна болест на дишните патишта, која се карактеризира со напади на бронхоопструкција и зголемена бронхијална реактивност. Денес се знае дека малите дишни патишта имаат предоминантна улога во бронхоопструкцијата кај астматичарите.
Може да биде предизвикана од еколошки и наследни фактори и основниот механизам кој доведува до симптоми на астма е сложената имунолошка реакција на респираторниот систем на алергени од непосредната околина, при што се развива воспалителна реакција. Аерозагадувањето и поленските зрнца значително влијаат кај астматичарите, што резултира со отежната клиничка слика.
