Исхрана за време на празниците – внимавајте со прејадувањето
Празниците имаат нешто заедничко – тоа е прејадувањето. Надуеност, болки во желудникот во комбинација со гасови, немир, мачнина, киселини, проблеми со спиењето, жиговина, се најчестите последици од прејадување за време на празничните денови. Најчесто, прејадувањето е проследено со газирани пијалаци, алкохол, слатки и долги часови седење на трпеза (неактивност).
Ризиците од прејадувањето не се однесуваат само на зголемување на килограмите. Постојаното прејадување може да доведе до бројни здравствени проблеми, почнувајќи од дебелина, дијабетес, кардиоваскуларни заболувања, висок крвен притисок, висок холестерол, високо ниво на триглицериди, ноќна апнеа, респираторни проблеми.
Прејадувањето за празници можеби нема трајни последици врз здравјето, но е состојба која не треба да се занемари. Без оглед што празничното прејадување не е постојан начин на исхрана, телото веднаш реагира на големата количина на храна и го алармира цел организам.
Освен зголемената работа на дигестивниот тракт (оптоварувањето на желудникот), напорно работат и другите органи: панкреасот, црниот дроб, срцето.
Се смета дека се потребни 20 минути за да се најадеме и сè понатаму е веќе прејадување. Исто така, умереноста во јадењето и пиењето се сметаат како најважни навики за здрав живот и долговечност. Умереноста треба постојано да се практикува, но на секого му се случува да се прејаде. Општите совети коишто ќе ве заштитат од прејадување, во основа значат вежбање самоконтрола, нешто што се смета како обврска во периодот на одмор и релаксација. Ви ги предлагаме следниве едноставни совети како да го спречите прејадувањето:
Планирајте – знаете дека периодот што следува е исполнет со обилни оброци. Затоа, обидете се да направите некаков распоред. На пример: прескокнете ги трите предјадења и изберете супа и една салата.
Не легнувајте после оброкот – Колку и да ви се спие, победете ја поспаноста и одлучете да излезете на прошетка. Одењето ја забрзува циркулацијата и на тој начин го подобрува варењето.
Совети при прејадување
Доколку сепак дојде до прејадување, постојат неколку начини да се соочите со мачнината:
- Пијте чај – камилицата има смирувачко дејство на стомакот, затоа се препорачува при прејадување. Нането исто така смирува, но не се препорачува ако страдате од враќање на киселини во желудникот;
- Прошетајте;
- Таблети за намалување на вишокот желудочна киселина, за брзо ублажување на жиговината и надуеноста. Ваквите таблети се прва помош за ублажување на желудочните тегоби при прекумерно консумирање храна и пијалаци;
- Пијте вода и избегнувајте сол и солена храна;
- Јадете лесно сварлива храна како ориз или компир за да не го иритирате стомакот.
