Медицинскиот уред е доволно мал за да може да се вгради директно во срцето само со помош на катетер
За нормално биење на срцето се смета она помеѓу 60 и 100 отчукувања во минута. Брадикардија е состојба што се карактеризира со бавно чукање на срцето, односно со помалку од 60 отчукувања во минута. Брадикардијата се манифестира со вртоглавица, отежнато дишење, замор и несвестица. Кај луѓето кај коишто страдаат од оваа состојба вообичаено се вградува пејсмејкер што преку електрични сигнали ја нормализира работата на срцето.
Најмалиот пејсмејкер „Micra TPS“, дело на „Medtronic“ којшто неодамна беше одобрен за вградување кај пациенти со срцевата состојба, брадикардија е со големина на витаминска капсула.
Пејсмејкерот „Micra TPS“ неодамна за првпат беше вграден кај пациентка на 27-годишна возраст во САД. Станува збор за Џоселин Бејсингер на којашто по влошување на здравствената состојба заради бавно работење на срцето и бил вграден новиот пејсмејкер што на досегашните тестирања покажа позитивни резултати.
„Micra TPS“ претставува иновација во медицината којашто може да го промени лицето на современата технологија што се користи за дизајн и изработка на пејсмејкерите. За разлика од повеќето конвенционални пејсмејкери коишто се вградуваат во градите, „Micra TPS“ се вградува директно во срцето на пациентот. Меѓу другото, новиот пејсмејкер е за 93% помал од досегашните пејсмејкери и е дизајниран со форма и големина на мала капсула. Исто така, „Micra TPS“ е првиот пејсмејкер изработен без олово што е одобрен за употреба во медицината во САД.
Заради практичната големина, пејсмејкерот многу едноставно се вградува директно во срцето на пациентот без дополнителни жици за функционирање како што се потребни за традиционалните пејсмејкери.
„Медицинскиот уред е доволно мал за да може да се вгради во срцето само со помош на катетер“, изјави д-р Пол Шурман, кардиолог во Хјустон, Тексас.
Уште една предност во дизајнот на пејсмејкерот е неговата долготрајност и адаптибилност. За разлика од досегашните конвенционални пејсмејкери, „Micra TPS“ се одликува со систем што се прилагодува на активностите на пациентот и што може да ја менува терапијата во зависност од неговите потреби, како и со батерија со животен век до 10 години.
