Pesokot-od-Sahara_image1
Споделете со пријателите!

Хороскоп за 15та недела: Дознајте какво ќе биде вашето здравје наредната недела, за да знаете што точно да игнорирате и да продолжите со старите навики надевајќи се на најдоброто.

Овен

Периодов, во неколку наврати ќе почувствувате гушење. Не, тоа нема да биде од загадениот воздух со песокот од Сахара, туку заради вашата ненаситност. Во животот, но и во јадењето, секогаш земате преголеми залаци кои никако не можете да ги сварите. 

 

Бик

Забрзано ќе итате кон вашата идеална фигура, но постојано ќе се сопнувате од столовите во кафаната каде што се обидувате да вежбате. Зборувањето дека ќе започнете со вежбање и вистинското вежбање, за вас е иста работа. Знакот на еднаквост ќе се претвори во плус на вагата. 

 

Близнаци

Со пролетните ветрови се буди и вашата желба за патување. Оваа недела ќе го игнорирате секој совет дека треба да одмарате од повредите добиени од вашата последна авантура и ќе побрзате да пронајдете нови начини како повторно би се нашле во опасност.  

 

Рак

До кога временските прилики ќе ви бидат изговор за вашето расположение? Луѓето околу вас се навикнати на вашиот камелеонски темперамент, но никој не сака да се справува со повеќе различни мислења наеднаш, особено кога тие доаѓаат од една личност.

 

Лав

Бучавата што ја слушате доаѓа од вашите мисли, бидејќи оние околу вас одамна престанале да се докажуваат со вас. Неделава ќе трчате секој ден надвор, само за да докажете дека загадениот воздух ништо не ви може.

 

Девица

Преокупираноста со ситници, преголемата желба за контрола и доминација, воспоставување стерилен ред по секоја цена – сите овие карактеристики не ги сметате за непријатели, не. Вашиот најголем непријател неделава ќе ви биде загадениот воздух како последица од сахарскиот песок. Тој ќе биде главниот виновник за сè.

 

Вага

Ѕвездите нема да ви бидат наклонети, бидејќи, нели, спротивно од астролошкото мислење, тие не постојат за вас. Самите ќе се погрижите да имате седмица помината со многу луѓе, па затоа на средината од викендот ќе се најдете себеси како балансирате на работ на каучот.

 

Шкорпија

Вашата комплексност и интригантност на никого нема да му бидат интересни. Надвор е пролет и луѓето само сакаат да се радосни. Радосните вибрации ќе ви предизвикуваат стомачни тегоби и полесни мигрени.

 

Стрелец

Вашите резерви на енергија упорно ќе ги делите на Раковите и Девиците, но безуспешно. Неделава ќе се обидете со трчање да избегате од проблемите што ви се наталожија последниов период. Барем ќе уживате во физичка активност, без разлика што не ви е од корист.

 

Јарец

Вие имате „Бенџамин Батон синдром“, односно со текот на годините изгледате подобро. Изгледа дека сета таа храна без вкус и постојаното вежбање, сепак се исплаќаат. Штета што нема физичка активност за да го направи истиот ефект и за вашите мисли.

 

Водолија

Ќе започнете со нова фитнес програма, што е толку нова, што никој не ја знае. А никој не ја знае, бидејќи ја измисливте вие. Како и секогаш, неделава ќе бидете нерешлива мистерија за оние околу вас.

 

Риби

Престанете да кажувате дека сте сонувачи поради тоа што со вас владее Нептун, бидејќи тој нема врска со вашите изговори. Недисциплината и неодговорноста, за кои кажувате дека се производ на креативност и уметнички дух, кажете ги со вистинското име, мрза. 

Прочитајте:  Огледалото на секој хороскопски знак

Споделете со пријателите!