Откритие за превенција на кариес

Нов начин на заштита на забите од кариес и продолжување на животот на пломбите е развиен од страна на научниците од Универзитетот во Отаго, а се состои од нано-честички што не предизвикуваат дамкавост

Технологијата се состои од специјално формулирани, сребрени нано-честички, создадени од страна на факултетот за хемија – University’s Department of Chemistry и стоматолошкото училиште – Dental School при универзитетот од Отаго – University of Otago, Нов Зеланд, со цел да се стопира кариесот и да се заштитат забите од расипување. Забарот го нанесува овој нов производ после отстранувањето на расипаниот дел од забот, но пред пломбирањето. На овој начин новиот препарат навлегува длабоко во забот каде што ги убива сите преостанати бактерии, коишто се најчеста причина за понатамошното расипување.

Сите досегашни достапни производи коишто го стопираат кариесот користејќи сребро, ги потемнуваат забите, односно ги поцрнуваат. Токму затоа овие досегашни препарати никогаш не биле популарни ниту помеѓу забарите, ниту пак биле барани од страна на пациентите.

„Ние веруваме дека нашата формула против дамкавост ќе биде важен чекор напред за оралната нега и јавното здравје“ – истакна Д-р Дон Швас – Don Schwass, главниот професор и стоматолошки протетичар при клиниката за орална рехабилитација. „Резултатот ќе биде таков што ремисијата на кариесот ќе биде значително намалена, додека пак пломбите ќе траат подолго, обезбедувајќи како економски, така и здравствени придобивки“ – додаде тој.

„Нашиот придонес е креирањето на стабилизирани нано-честички со одредена големина, користејќи уникатен метод на производство со што крајниот резултат е чист производ што не предизвикува дамкавост“ – рече Д-р Карла Меледандри – Carla Meledandri, професор на Факултетот за хемија. Овој производ неодамна беше патентиран од страна на Otago Innovation Ltd за понатамошен развој.