horoskop-49-nedela
Споделете со пријателите!

Хороскоп за 49та недела: Оваа недела, Стрелците ќе одржуваат вита става, Лавовите ќе губат калории со удирање на глава во ѕид, додека за убавината на Девицата ќе биде заслужен стресот. На Шкорпиите ќе им се оствари желбата од детството, а Водолиите ќе бидат слатки како глазирани крофни.

Овен

Веќе почнавте секој ден да проверувате колку снег паднал на планините. Кон крајот на неделата, вашиот ентузијазам ќе стане неподнослив за околината. На вашите најблиски им пречи ладното време, тие постојано се прашуваат зошто ли е ладно во декември, па затоа викендот ќе го поминете во најдобро друштво – сами на врв на планина.

 

Бик

Размислувањето да започнете со вежбате ви потроши точно 0 калории. Сменете го хамлетовскиот пристап и делувајте проактивно. Но најпрво, ќе треба да јадете нешто за енергија. Ќе се одлучите за фамилијарна пица бидејќи вие сте ориентирани кон семејството, без разлика на тоа што сами ќе ја изедете.

 

Близнаци

Оваа недела за вас имаме само еден совет: обидете се да вежбате рано наутро, додека мозокот ви е сè уште поспан а воедно и мрзливиот близнак да не види што се случува. „Збуни го непријателот“ ќе биде вашето мото оваа недела.

 

Рак

Вашите манипулативни техники оваа недела ќе се свртат против вас а вие како и секогаш, утеха ќе побарате во храната. Потребни ви се сигурни избори во животот. Како пица. Пицата никогаш нема да ве напушти, пицата никогаш нема да ве разочара. 

 

Лав

Ве боли глава? Па не е ни чудо со оглед на нејзината големина. Обидете се да ја отстраните болката со силно удирање на глава во ѕид. Наводно, така се губеле калории и тоа дури 150!

 

Девица

Стресот многу убаво ви ги истакнува очите, додека брчките настанати од неспиење им прават рамка, што ја формира сликата на една успешна личност. Вие сте убедени дека сонот е за слабаци а ручекот за неработници. Продолжете со ова темпо на современо живеење, бидејќи тоа темпо значи танцување во ритамот на стресот.

 

Вага

Оваа недела вие посветено ќе работите на себе. Вредно ќе јадете сè што гледате на трпеза. Како знак кој што ги цени високите естетски вредности, ќе бидете презадоволни од совршената кружна форма на вашето тело.

 

Шкорпија

Радувајте се! Вашата желба од детството да бидете невидливи, оваа недела конечно ќе ви се оствари. Никој нема да ве забележува, а уште помалку ќе се грижи за вашите здравствени навики. Што и да правите, сфатете дека го правите за себеси, не за другите.

 

Стрелец

За вашата тенка линија заслужно е постојаното скокање во пребрзи и најчесто погрешни заклучоци. Продолжете вака и секогаш ќе бидете вити. Барем до почетокот на новогодишните празници, односно сè додека не започнете со вашиот омилен зимски спорт – внесување на огромни количини руска салата во комбинација со домашни кифлички.

 

Јарец

Упорно станувате рано за да го почувствувате мирисот на успех наутро, но секогаш ве дочекува мирисот на разочарување. Како животно кое сака да се качува на непристапни места, пробајте да стигнете до една невозможна состојба наречена среќа и задоволство од себеси. Вие го можете тоа.

 

Водолија

Бидејќи за вас е нормално да знаете сè, запознаени сте со максимата „ти си она што јадеш“. Затоа јадете колачи и торти како да нема утре, за да бидете слатки. Оваа желба ќе ви се оствари на пролет, кога заносно ќе се тркалате по улица како прекрасна глазирана крофна. Мх, мх, мх…

 

Риби

Со почетокот на зимата започнува и вашата новата диета која што се вика – јадете сè и очекуваjте чудо. Но сепак ќе се потрудите да внесувате плодови од природата. Плодовите што ќе ги консумирате, ќе бидат исклучиво од животинско потекло, поточно месни.

Прочитајте:  Што сакаат да гледаат хороскопските знаци

Споделете со пријателите!