Направете ќофтиња од модри патлиџани наместо од месо
За подготовка на ќофтиња или плескавици без месо, не е потребен рецепт. Обично основата е сварен грав, леќа или наут, или некоја житарка, потоа се додаваат зеленчуци, зачини и во зависност од текстурата на смесата, презла или овесни снегулки. Така настанаа и овие ќофтиња коишто се многу добро прифатени кај љубителите на стандардните ќофтиња.
- 1 – 2 модри патлиџани;
- ½ шолја сварен грав;
- сол;
- бибер;
- ½ лажиче мешавина од зачини (црвен пипер, коријандер, ѓумбир, куркума, кардамом, кумин, пимент, чили и сушен кромид);
- ½ лажиче пиментон (шпански лут црвен пипер);
- 1 лажиче оригано;
- 2 лукчиња, згмечени;
- 2 лажици сончоглед;
- ¼ шолја презла;
- 2 лажици пченични трици;
- магдонос.
Исечете ги модрите домати на широки кругови, на околу 1,5 – 2 cm, наредете ги во големо тавче врз хартија за печење, премачкајте ги со маслиново масло и ставете ги да се печат во рерна загреана на 200°C, околу 20 – 25 минути, или додека не омекнат. Може да испечете повеќе и да ги замрзнете, а потоа да ги користите во мусака или други рецепти. Изгмечете го гравот со вилушка. Исецкајте ги модрите на помали парчиња и помешајте 2 ½ шолји со гравот. Можете да ги сомелете модрите патлиџани и гравот во „сецко”, а може да оставите и парченца. Додајте ги лукчето, зачините, презлата и триците, за да може смесата да се обликува. Додајте сончоглед за да има и нешто крцкаво и убаво измешајте.
Потоа обликувајте топчиња колку оние за пинг-понг, најдобро со раце намачкани со масло, или со брашно, ама маслото е подобро кога смесата е леплива, и печете ги врз хартија за печење на 175°C околу 20 – 30 минути. Добро е на средина од печењето да се превртат. Печете ги цели 30 минути за да бидат покрцкави, но и не е задолжително, бидејќи состојките во нив се веќе зготвени.
Од овој рецепт се прават дваесеттина топчиња. Може да ги јадете во тортиљи, со пржени печурки и кромид, и со салата од бела зелка и моркови. И се разбира, со лут сос сирача.
* рецептите со во целост преземени од ситно сецкано
