Кегеловите вежби ги зајакнуваат карличните мускули, го контролираат мокрењето, ги одржуваат карличните органи на своето место а можат да ви помогнат да ја превенирате или контролирате уринарната инконтиненција
Овие вежби се многу лесни за изведба и може да се прават дискретно секаде без некој да знае дека ги правите. Лекарите најчесто им ги препорачуваат овие вежби како на жените, така и на мажите за разни видови на инконтиненција. Ослабувањето на карличните мускули поради класично породување кое што може да доведе до изместување на органите, може да се превенира токму со помош на кегелови вежби, пред и после породувањето.
Овие вежби се препорачуваат и за подобрување на сексуалниот живот, подобри ерекции и спречување на прерана ејакулација кај мажите.
Вежбите се откриени од страна на Арнолд Кегел во 1948 година. Овие вежби се едноставни кога ќе сфатите на кои мускули треба да се фокусирате. Еден од најлесните начини за пронаоѓање на мускулите што треба да се вежбаат е за време на мокрењето. Обидете се да го прекинете или 
забавите уринирањето. Важно е да не контрахирате други мускули од телото. Се препорачуваат по три серии дневно од по неколку минути. Почетниците пожелно е да започнат да ги прават во легната положба. За почеток, контрахирајте ги мускулите неколку секунди и отпуштете ги неколку секунди. Дишете слободно за време на вежбањето – не го сопирајте дишењето.
„Луѓето прават кардио вежби за своето срце и прават тренинзи за зајакнување и се фокусираат на стомачните, но карличните мускули се запоставени. Овие мускули се основата на сексуалното и уринарното здравје“, истакнува д-р Ендрју Сигел – Andrew Siegel.
Бидете трпеливи во однос на вашите резултати
Експертите велат дека со редовно вежбање, контролата врз мочниот меур се подобрува за време од три до шест недели, а може и побрзо. Доколку не забележите никакви подобрувања во рок од еден месец, најверојатно не сте ги вежбале соодветните мускули. Доколку имате проблем со правењето на овие вежби, не срамете се да побарате лекарска помош. Вашиот лекар може да ви објасни како едноставно да ги лоцирате соодветните мускули за кегелови вежби.
Понекогаш потребни се и уреди за биофидбек кои се вметнуваат ректално или вагинално. Создаден е нов уред за полесно пронаоѓање на машките кегелови мускули. Оваа иновација наречена kGoal, нема да биде достапна на пазарот сè до јули 2016. Mayo Clinic советува да не се стекне навика за започнување и запирање на уринирањето со помош на кегелови вежби. Правењето на кегелови вежби за време на мокрењето може да доведе до неиспразнување на мочниот меур што го зголемува ризикот од појава на уринарна инфекција.
