Нови истражувања откриваат дека вежбањето може да ја намали сериозноста на симптомите што се појавуваат во првата фаза од откажувањето од цигарите.
Сите пушачи се свесни дека пушењето цигари е штетно за здравјето, но вообичаено откажувањето од нив може да биде особено тешко. При откажувањето од цигарите првите симптоми што се појавуваат се раздразливост, проблеми со спиењето, па дури и депресија, коишто се манифестираат како знак дека организмот се бори против зависноста од тутунот.
Веќе е познато дека вежбањето ги намалува симптомите што се вообичаени за откажувањето од цигарите. Некои постари истражувања покажаа дека дури и краткотраен 10-минутен обид за умерено вежбање може да има непосредни ефекти на намалувањето на желбата за тутун.
Иако механизмите одговорни за овој ефект остануваат непознати, едно истражување нè приближува до нивното разбирање бидејќи покажува колку различни интензитети на вежбање влијаат врз желбата за никотин кај глувците.
Д-р Алексис Бејли, предавач по неврофармакологија на „St George’s University“ во Лондон во Обединетото Кралство, е авторот на студијата чии наоди се објавени во Британскиот дневник за фармакологија.
Бејли и неговиот тим направиле истражување во кое биле вклучени глувци коишто најпрво 14 дена биле изложени на никотин, а потоа биле подложени на три различни активности. Првата активност вклучила трчање на тркало 24 часа на ден, втората трчање на тркало 2 часа дневно, додека третата не вклучила физичка активност.
На 14. ден истражувачите ги оценувале симптомите на откажување од никотинот кај глувците, а исто така анализирале и делови од нивниот мозок. Тимот открил дека глувците што биле изложени на никотин, а кои трчале на тркалото 2 или 24 часа дневно, покажале значително намалување на сериозноста на симптомите при откажување од тутунот во споредба со глувците коишто не биле изложени на физичка активност.
Дополнително, кај глувците коишто трчале, истражувачите забележале зголемување на активноста на еден никотински рецептор наречен алфа-7 никотински ацетилхолин. Рецепторот е сместен во хипокампусот на глувците, област на мозокот поврзана со создавање на нови спомени и со нарушувања на расположението.
„Овие наоди го поддржуваат позитивниот ефект што вежбањето може да го има врз откажувањето од цигарите, односно врз сериозноста на симптомите што се појавуваат од никотинската зависност, но може да поттикнат и развој на раличен тип на интервенции кај луѓето коишто планираат да се откажат од цигарите што може да ги зголеми шансите за откажување од оваа зависност, додаваат д-р Бејли и неговите колеги.
Тимот истакнува дека резултатите од нивната студија ја покажуваат ефективноста на, дури и, умерено вежбање врз намалувањето на симптомите што се појавуваат на почетокот на откажувањето од никотинот и укажуваат на хипокампалниот, алфа-7 никотински ацетилхолин, систем како потенцијален механизам кој го нагласува овој ефект.
Ова е прва студија што покажала длабок ефект од вежбање кај животни зависни од никотин. Сепак, авторите, исто така, предупредуваат дека доказите сè уште не се доволни за да се утврди причинската врска помеѓу зголемената активност на хипокампалниот никотински рецептор и позитивните ефекти од вежбањето.
