Хомеопатијата отсекогаш се движела по тенката линија на скепса и верување а руските научници целосно ја отфрлија како метод за лечење
Поддржувачите на хомеопатијата уверуваат дека таа треба да се сфати сериозно. Тоа е точно, таа мора да се сфати сериозно бидејќи освен тоа што нема докажан медицински ефект за лечење на болест, со нејзиното користење и избегнување на потребните и препишани медицински терапии, заболените си го ставаат животот под ризик.
Најновите вести од полето на науката, доаѓаат од Русија, поточно од Руската академија на науките која донесе одлука во врска со хомеопатијата. Тие одлучија дека хомеопатијата треба да се отстрани од здравствениот систем а хомеопатските лекарства да се означат како бесполезни.
„Во научната јавноста на хомеопатијата денес се гледа како на псевдонаука“, се вели во меморандумот на Комисијата за борба со псевдонауката при Руската академија на науките, објавен на 6 февруари оваа година.
Хомеопатијата е форма на алтернативната медицина, предложена од германскиот физичар Самуел Ханеман во 1796, кој се обидел да ги лечи своите пациенти со силно растворени супстанци, за кои се тврди дека имаат слични ефекти како и симптомите што го предизвикале заболувањето. Неговата претпоставка се основа на формулацијата „нештото се лекува со истото нешто“, односно она што ја предизвикува болеста, доколку се даде во мали дози, претставува лек.
Приврзаниците на хомеопатијата тврдат дека разредениот лек ја зачувува ефикасноста, а другите се уверени дека хомеопатијата нема буквално никаков ефект. Хомеопатските лекови, без исклучоци се сметаат за потполно безбедни. Меѓутоа, некои хомеопати биле критикувани затоа што своите пациенти ги изложувале на ризик со тоа што ја избегнувале конвенционалната медицина како вакцинацијата, анти-малариски лекови и антибиотици.
Најважно е со хомеопатија да не се лекуваат сериозни болести бидејќи овој метод на лекување со ништо не се разликува од плацебо ефектот и кога станува збор за тешки болести може да загрози живот, велат научниците.
Русија не е единствената земја којашто смета дека хомеопатијата нема ефект. Воедно, постои и голема база на истражувања коишто го докажуваат ова. Меѓу проверените 225 истражувања, имало и неколку коишто покажуваат дека хомеопатијата е ефикасна, но нивниот квалитет бил слаб, односно со големи грешки во методологијата и недоволно учесници коишто би докажале дека хомеопатијата функционира подобро плацебо апче.
