Во понеделник ќе се одржи детска едукативна претстава за аерозагадувањето
Во понеделник, на 26.12 во 19 часот во Младинскиот Културен Центар во Скопје, ќе се одржи детскиот мјузикл „Градот моли: ме угушивте, ме боли!” Скопје Смог Аларм поддржан од Еко Свест и во соработка со колектив Ветерница, подготви детска едукативна претстава која како тематика го обработува проблемот со аерозагадувањето на сликовит и интересен начин. Мјузикл кој преку најубавите детски песнички успева да го задржи вниманието дури и на најмалите, со една цел – зголемување на нивото на свест за последиците од загадувањето, од кое за жал се најпогодени оние кои ни значат најмногу, стои во описот на настанот.
„Идејата беше на креативен начин да ја таргетираме нашата најранлива група на граѓани и на креативен начин на родителите им го посочиме проблемот со енормното загадување на воздухот“, вели Мерима Кондов од Скопје Смог Аларм.
„Ни претставува огромна чест што токму ние го добивме овој грант од страна на Еко свест. Претставата е мјузикл кој е изработен од страна на вештиот тим на Ветерница. Дечињата кои глумат се извонредни таленти на кои им предвидуваме светла актерска иднина…Единствено се молиме пораката да не биде иста, се молиме оваа да е последната година во која ни се отруја дечињата во чад и смог. Сакаме да организираме претстави во кои темата ќе биде ведра а не ранлива, сакаме воздух ТОА Е СЕ! Исто така би додала дека бидејќи станува збор за претстава од едукативен карактер, идејата е да има уште многу емитувања потоа. Се надеваме на успешен проект кој ќе може подоцна да се прошири во училиштата, градинките, истакнува Кондов.
Влезот е слободен, но за да си обезбедите место, резервирајте билет на veternicainfo@gmail.com.
