Чоколадо и таан е одлична комбинација…
Рецепти за чоколадни тартови се многу, но чоколадото и таанот верувајте се одлична комбинација. Тестото е малку поразлично, има и јајце, а количината е доволна за два тарта, па половина може да замрзнете за другпат, бидејќи со наведените состојки за филот се добива доволно фил за еден тарт.
- 90 g шеќер во прав;
- 235 g сенаменско брашно;
- 115 g ладен путер, исечен на коцки;
- 1 јајце;
- 1 жолчка.
Помешајте ги брашното и шеќерот во вангла, додајте ги коцките путер и притиснете ги со брашното со прсти или со блендер за тесто додека не добиете мешавина која изгледа како презла.
Изматете ги заедно јајцето и жолчката, додајте ги кај брашното и промешајте прво со вилушка, а потоа со раце спојте го сето тоа во тесто. Поделете го тестото на два еднакви дела и ако правите само еден тарт, едното замрзнете го, а другото завиткајте го во прозирна фолија и ставете го во фрижидер на 2 часа или до следниот ден.
- 250 ml млеко;
- 120 g темно чоколадо;
- 1 јајце;
- 2 лажици шеќер;
- 1 лажица нишесте;
- 1 лажица таан.
Загрејте ги млекото и чоколадото на средно, со мешање, додека чоколадото целосно не се стопи. Изматете го јајцето со шеќерот и нишестето, додајте го таанот.
Претурете го млекото со чоколадо кај јајцето, промешјте па ставете го сето тоа повторно на рингла на тивко. мешајте постојано со дрвена лажица додека смесата не почне да се згуснува, околу 5 минути. Тргнете го филот од шпорет и оставете го малку да се олади.
Тавчето со дијаметар од отприлика 22 cm премачкајте го со путер, исукајте го тестото врз фолијата во која беше завиткано за полесно префрлување или директно на малку побрашнета маса. Префрлете го во тавчето, притиснете го на дното и на страните и избодете го дното со вилушка на неколку места.
Сипете го филот во тестото и порамнете ја површината. Печете го тартот во загреана рерна на 180ºC околу 30 минути. Потоа оставете го целосно да се олади пред да го послужите.
* рецептите со во целост преземени од ситно сецкано
