Кај доилките и децата опстипацијата е честа појава
Опстипација кај деца е честа појава, а децата кои имаат опстипација се соочуваат со нередовна столица или тврда односно сува столица. За среќа повеќето случаи на опстипација кај деца се привремени. За почеток потребно е да се смени начинот на исхрана, јадење повеќе овошје и зеленчук, и пиење на повеќе течности. Тие на подолг рок ќе помогнат за да се спречи повторно јавување на опстипација. Доколку докторот одобри тогаш за побрз ефект се препорачуваат лаксативи.
Симптоми:
- Помалку од 3 празнења на цревата неделно
- Празнењата се тврди, суви и тешко поминуваат
- Придружени се со болка додека има празнење
- Стомачна болка
- Крвава столица
За третман доколку е одобрено од лекар, може да се користат лаксативи.
Прв избор на лаксатив, е лактулозата. Таа е дисахарид од фруктоза и галактоза, најчесто со вкус на круша, природен лаксатив, кој откако ќе се испие стигнува до дебелото црево, каде поттикнува перисталтика и апсорбира вода, и кога ќе апсорбира доволна количина на вода, преку потикнување на перисталтика овозможува празнење на фекалната маса. За да настапи дејството потребно е неколку часа, и притоа да се испие поголемо количество на вода.
Доколку има и стомачна болка тогаш може да се земе и камилица. Чајот од камилица е секојдневно користен за третман на дигестија, колики, дијареа, олеснува и менструални грчеви како и главоболки. Камилицата преку научни испитувања е докажано дека има антибактериско, антифунгално и антивирусно дејство. Кај децата истотака помага за смирување на болките кои се јавуваат при опстипација.
Анасон се користи како средство за лошо варење. Благодарение на етерните масла, семенките од анасон го потикнуваат лачењето на ензимите за варење, и на тој начин ја подобруваат дигестијата и апсорпцијата на хранливите материи. Покрај тоа помага за намалување на гасови и надуеност. Анасонот се користи и како лаксатив во третман на дигестивни нарушувања заради неговите ГИТ ефекти, пред се стимулација на мотилитет и антиспазмолитично дејство.
Кај доилките исто така често се јавува опстипација, па за кај нив е потребно да се земе лаксатив кој не се излачува во мајчиното млеко. Горенаведените природни препарати се потполни безбедни да се користат без да постои опасност дека ќе се излачат во мајчиното млеко.
Други совети се:
- Внес на доволна количина на растителни влакна;
- Да се јаде почесто но помали оброци;
- Пиење на доволно вода.
М-р фарм. Леон Парталоски
