Kонцепт на третман со мини дентални импланти

Мини имплантите најчесто поседуваат конусна или цилиндрична форма адекватна за квалитетот на коска во горна или долна вилица

Пред дваесетина години, Dr.Victor Sendax и Dr.Ronald Bulard (Manhattan, New York) развиле иновативен дентален продукт – импланти со ултрамал дијаметар и уникатен дизајн. Изработени се од биокомпатибилен чист медицински титаниум или титаниумска легура (титаниум, алуминиум, ванадиум) која покажува висок степен на јакост, тврдост и успешност при пренос на функционалните оклузални сили.

Чистиот медицински титаниум претставува материјал на избор за мини денталните импланти чија површина, аналогно на стандардните импланти, може да биде модифицирана (пескарена, оксидирана или киселински обработена) со што се овозможува поголем имплантно-коскена контакт (BIC –bone/implant contact) кој ја фаворизира осеоинтеграцијата. Макродизајнот на мини имплантите најчесто е претставен со спирални или прогресивните навои кои можат да бидат саморезачки („self-threading”) овозможуваjќи прецизна инсерција и добра примарна стабилност на мини имплантите. Мини имплантите најчесто поседуваат конусна или цилиндрична форма адекватна за квалитетот на коска во горна или долна вилица со дијаметар под 3мм, должина над 10 мм (10.5мм, 12мм и 15мм) и протетички надкоскен дел, на пример со топчест облик (ball attachment или локатор систем) слика во прилог.

Мини денталните импланти претставуваат револуционерен концепт со огромен број на индикации и минимален број на лимитирани можности. Индицирани се кај:

• тесни и остри резидуални алвеоларни гребени или кај пациенти со голем степен на коскена ресорпција како инструменти за зголемување на стабилноста на долната тотална протеза;
• со помош на МДИ можат да се избегнат вулнерабилните анатомски структури (синус, коскени канали и нерви);
• индицирани и кај недостаток на еден заб каде нема услови за инсерирање на имплант со конвенционален дијаметар;
• можност да се вклучат и во фиксни протетички конструкции;
• при евентуални компликации како отсуство на секундарна коскена интеграција или фрактура на мини имплантот, лесно и едноставно се заменуваат со нов имплант блиску до примарниот. 

Апсолутните контраиндикации се подеднакви како и кај другите имплантолошки системи и тука спаѓаат накратко: неконтролираниот дијабет, радијациониот третман, имуносупресивната терапија, присуството на парафункциите, зависност од наркотични средства и сл. Релативни контраиндикации: пушачи, Sy Sjogren (мал степен на самочистење), Alzhaimer (намалена можност за орална хигиена) итн.

Социјални аспекти

Голем број на пациенти со тотална беззабост се згрижуваат со тотално протезирање кое е регулирано со државен социјален пакет. Успешното инсерирање на мини имплантите дава перспективи за решавање на социјалните и практичните проблеми (дискомфорт на пациентите, неадекватна стабилност на долната тотална протеза и сл.) кај оваа категорија на пациенти.