Како да ги надминете фобиите

Научниците сметаат дека пронајдоа начин да ги надминете фобиите на безбеден начин

Стравот е основен човечки процес исто како дишењето, но сепак досега никој докрај не го открил начинот на кој функиционира. Научниците откриле дека стравот има посебен дел во човековиот мозок, па така, не можеме трајно да се ослободиме од стравот, но можеме да се соочиме со него. Човекот има само два вродени стравови – страв од паѓање и страв од гласни звуци. Останатите се фобии.

Според дефиниција, фобија претставува „неразбирлив страв на психичка основа“. Постојат бројни истражувања на оваа тема, коишто досега докажале дека најделотворен начин во борбата со фобиите е соочување со нив. Можеби звучи едноставно, но ова не е воопшто лесна постапка да се изведе.

Токму затоа, научниците сметаат дека пронајдоа метод кој ќе ви помогне да се соочите со стравот. Сево ова може да се изведе со помош на компјутер. Имено, компјутерот ви помага непосредно да ја видите својата фобија, преку брзи слики од стравот, без тој да е физички присутен во ваша близина. Фобиите претставени на ваков начин и со одредена брзина на прикажување, мозокот ќе ги регистрира и ќе помогне тие да се намалат, тврдат научниците.

Овој метод најпрво бил испитан кај лица со страв од пајаци (како еден од најчестите фобии) и кај лица коишто патат од социјална вознемиреност. Двете групи потврдиле дека после третманот, полесно се соочуваат со стравовите.

Испитувањето било извршено со помош на магнетна резонанца, со цел да се види физичка реакција од третманот. Иако испитаниците не биле свесни за фотографиите што ги гледале во екранот, заради големата брзина на прикажување, нивниот мозок ги регистрирал. Ова се забележало според зголемената физичка активност во делот на мозокот „задолжен за страв“. Ваквиот третман е наречен VBE (very brief exposure), скратеница за „многу кратко изложување“.

„Доколку може сликовно да се прикаже нечиј страв, можете да ја користите оваа техника“, вели Пол Сигл Paul Siegel, проф. по психологија на NYU, кој на оваа студија работел заедно со професори во полето на педијатријата и психијатријата. Третманот бил применуван само врз жени и се состоел од неколку фази. Во првата фаза, објектот на страв, во случајов пајак, бил прикажан само 0,03 секунди и потоа веднаш заменет со други смирувачки фотографии. Оваа брзина понатаму се намалувала, сè додека пајакот јасно не се забележувал, односно постепено се зголемувало времето на прикажување на фобијата.

„Третманот нема да ја излечи фобијата“, истакнува проф. Сигл, „но може да третира одредени несвесни делови на стравот со што овозможува полесно соочување со ставот“, објаснува тој.

Во моментов се работи на нови истражувања, коишто би им помогнале на лицата со поголеми фобии, како што се нарушувањата настанати од пострауматски стрес.