Нов метод за затворање на рани [ВИДЕО]

Нова технологија за помалку болно и брзо затворање на рани

Кога станува збор за третирање на рани, медицината се нема многу променето уште од Стар Египет. Шиењето на раните сè уште е основниот начин за превенција на инфекции и начин на лечење на рана. По илјадници години на шиење рани, израелски лекар откри нов метод за затворање на рани. Неговиот изум, наречен TopClosure веќе се користи во израелските болници. TopClosure, на функционален начин ја растегнува кожата околу раната со цел да се избегнат кожни графтови (процедура на ставање на кожа од друг дел на телото врз сошиената рана) но и естетски лузни, оставајќи ја кожата со здрав изглед. Пронаоѓачот, д-р Морис Топаз – Dr. Moris Topaz, сфатил дека конците не можат ефективно да ја затворат/прицврстат раната за таа да можесоодветно да зарасне без лузни.

„Кога затвораме рана со конци, на кожата се создава голем притисок“, тврди тој. Со TopClosure притисокот односно тензијата на кожата се распоредува и се намалува. „Најважното е дека овој метод е едноставен“, вели д-р Топаз.

Тој истакнува дека е време да се збогуваме со кожни графтови, операциите и конците и да му посакаме добредојде на новиот метод за третирање на рани за кој се надева дека ќе стане стандардна процедура во иднина. TopClosure се состои од два главни делови: Жици за поврзување и копчиња-прицврстувачи. За полесно прилагодување на различните видови односно големини на рани, овие жици имаат различна должина а копчињата се лесно се прилагодуваат на нив, овозможувајќи целосна поддршка. Двете копчиња се поставени едно спроти друго од двете страни на раната и со помош на долгите жици коишто се прицврстуваат во копчињата, на природен начин се спојува кожата и се затвора раната без користење на конци.

Ова помагало е направено од полимер, со претходно тестирана издржливост, која предвидено попушта за да не дојде до кинење на кожното ткиво заради голем притисок на кожата, како што е случај при шиењето. TopClosure ја зема во предвид еластичноста на кожата за да го оптимизира затворањето на раната.

Овој иновативен и неинвазивен метод, може да се користи пред операција, со цел кожата да се подготви, за време на операција, со цел да се намали притисокот на кожата и воопшто, за да се забрза процесот на заздравување на раната.

Еве како изгледа овој метод: