Омилениот летен десерт – сладоледот со еден освежителен и несекојдневен вкус
Сладоледот од нане се одликува со силен ментол вкус, а одличен додаток и заокружување на задоволството, се малите парчиња чоколадо измешани низ сладоледот.
- 1 шолја млеко;
- 2 шолји слатка павлака;
- ¾ шолја шеќер;
- 2 шолји убаво наполнети со ливчиња свежо нане;
- 5 жолчки;
- 140 г темно чоколадо.
Во тенџерче загрејте ги млекото, шеќерот и 1 шолја слатка павлака. Мешајте додека шеќерот не се стопи, потоа додајте ги ливчињата нане, промешајте и тргнете го тенџерето од шпорет. Оставете го покриено, околу час, час и половина. Процедете го млекото низ цедалка, убаво стиснете ги ливчињата нане да пуштат што повеќе вкус, па фрлете ги, а млекото повторно загрејте го на тивко.
Изматете ги жолчките. Сипете 2, 3 лажици од топлото млеко во жолчките, промешајте, па сипете ги жолчките во тенџерчето со млеко. Постојано мешајте со дрвена лажица на средно слаб оган додека смесата малку не се згусне, а потоа додајте ја уште онаа 1 шолја слатка павлака. Промешајте убаво и оставете ја смесата да се олади на собна температура, а потоа и во фрижидер два часа или во замрзнувач нешто пократко.
Оладете го и садот во кој ќе го чувате сладоледот. Кога смесата за сладолед ќе биде убаво оладена, стопете го чоколадото. Сипете малку чоколадо на дното, па малку сладолед, па пак од чоколадото, па сладолед. Прошарајте го целиот сладолед со чоколадо и ставете го во замрзнувач неколку часа пред да го послужите.
* рецептите со во целост преземени од ситно сецкано
