Овие мобилни апликации коишто се фокусираат на подобрување на менталното здравје користејќи различни методи, вклучувајќи медитација, хипноза, когнитивна бихевиорална терапија и сл.
Како резултат на постојаниот напредок на мобилната технологијата секојдневно се креираат апликации кои имаат за цел да го олеснат нашиот живот. Денеска се достапни многубројни апликации коишто имаат различни намени меѓу кои и за одржување на доброто здравје.
Кога станува збор одржување на здравјето, постојат aпликации креирани со цел да придонесат во подобрувањето на различни аспекти на истото. Меѓудругото, некои од овие современи апликации овозможуваат броење на внесените калории на дневно ниво, проверување на срцевиот пулс, сè до следење на менталното здравје и благосостојба.
Според една студија спроведена на територијата на САД, околу 48,3 милиони возрасни лица се соочуваат со состојба на ментално здравје секоја година, а 9,8 милиони од нив се со сериозни симптоми кои ги ограничуваат во извршувањето на активностите од секојдневниот живот. Меѓу возрасните на возраст од 18 до 44 години во САД, нарушувањата на расположението, како што се депресија и биполарно растројство, сега се третата најчеста причина за хоспитализација. Понатаму, за оние коишто живеат со потешки ментални болести се смета дека е поголема веројатноста да се соочат со хронични медицински состојби и да умрат околу 25 години порано.
Редовното вежбање и здравото исхранување може значително да го подобри менталното здравје и благосостојбата, да помогне да се намалат симптомите на депресија, вознемиреност и стрес и да се зголеми ендорфинот – хормонот на среќата.
Во прилог претставуваме 5 мобилни апликации коишто преку различни методи, вклучувајќи медитација, хипноза, когнитивна бихевиорална терапија (КБТ) и сл. се фокусираат на следење и подобрување на менталното здравје.
„Calm“
Апликацијата „Calm“ беше прогласена за „App of the Year“ на „Apple“ во 2017 година. Апликацијата е дизајнирана да ја намали анксиозноста, да го подобри спиењето и да помогне да се чувствувате посреќни. „Calm“ се фокусира на четири области – медитација, дишење, спиење и релаксација. Апликацијата обезбедува медитации, програми за дишење, музика и звуци од природата за релаксација на умот и телото.
„Headspace“
„Headspace“ има за цел преку медитација да ви помогне да го подобрите фокусот и вниманието, како и да водите поздрав живот. Без разлика дали станува збор за подобрување на расположението дома или на работа, оваа апликација е дизајнирана за да ви помогне да се фокусирате и да го намалите стресот.
„Moodpath“
Целта на апликацијата „Moodpath“ е да ве поддржи низ тешките моменти и да ве води низ текот на денот. Имено, „Moodpath“ поставува дневни прашања со цел да ја процени вашата благосостојба и да скенира за симптоми на депресија. По период од 2 недели, апликацијата генерира електронски документ за кој можете да разговарате со медицинско лице. Исто така, на апликацијата се достапни видеа и психолошки вежби за да ви помогнат да го зајакнете вашето ментално здравје.
„Pacifica“
„Pacifica“ во фокусот ги става анксиозноста и стресот. Апликацијата овозможува поставување на предизвици кои би ви помогнале да се справите со анксиозноста и стресот на дневно ниво. Исто така, преку медитација, можност за следење на расположението и релаксирачки методи, може да помогне во одржување на менталното здравје.
„SuperBetter“
„SuperBetter“ е игра што се фокусира на зголемување на издржливоста и способноста да останете оптимистички и мотивирани личности кога се справувате со предизвикувачки настани во животот.
Една студија од Универзитетот во Пенсилванија во Филаделфија покажа дека кога луѓето играат „SuperBetter“ во период од 30 денови, нивното расположение се подобрува и симптомите на анксиозност и депресија се намалуваат.
* Забелешка: Гореспоменатите мобилни апликации не можат да бидат замена за лекови. Доколку почувствувате било какви промени во Вашето здравје консултирајте се со Вашиот лекар.
