5-greshki-shto-gi-pravat-roditelite-detskoto-sedishte-za-vo-avtomobil_image
Споделете со пријателите!

Кои се петте најчести грешки што како родител треба да ги избегнувате кога станува збор употреба на детско седиште во автомобилот?
Со цел да се овозможи максимална заштита и безбедност на детето во текот на возењето неопходно е правилно поставување на безбедносно детско седиште во автомобилот. За жал, многупати родителите заради брзање или заради други причини не го користат седиштето со што го зголемуваат ризикот од повреда кај детето при сообраќајна несреќа.

Кои се петте најчести грешки како родител треба да ги избегнувате кога станува збор употреба на детско седиште во автомобилот?

Не го користите безбедносното седиште постојано

Заборавете на оправдувањата како „Ние само одиме до продавница да испазариме набрзина“, „Нашата ќерќа плаче и не сака да се вози во нејзиното седиште“, „Многу плачеше, па го земав од седиштето на една минута за да се смири“.

„Заборавете на оправдувањата како ‘Ние само одиме до продавница да испазариме набрзина’“

Експертите за безбедност ги слушаат овие изговори премногу често од страна на родителите кои се попустливи кон своите деца. Но запомнете, еднократниот пропуст да не се користи безбедносното седиште заради некоја од горенаведените причини може да резултира со несреќа во која вашето дете може сериозно да настрада.

Задолжително е постојано и правилно користење на сигурносното детско седиште во патнички автомобил и тоа е утврдено според закон во секоја земја. Во нашиот Закон за безбедност на сообраќајот на патиштата се потенцира дека во патнички автомобил на задното седиште смее да се превезува дете помало од пет години, во поставено посебно детско седиште кое за седиштето од возилото е прицврстено со сигурносен појас или на друг соодветен начин.

„Пластиката со текот на времето станува почувствителна и кршлива бидејќи старее, па седиштата кои се стари повеќе години се лесно кршливи“

Реупотребувате старо седиште од брат/сестра

Секој родител за второто или третото дете има навика да реупотреби облека, играчки, количка или детско седиште кои ги купил за првото дете. Но старото детско седиште коешто сте го користеле за првото дете не е безбедно за реупотреба. Исто така, и она седиште коешто вашата пријателка ви вели дека со задоволство ќе ви го подари бидејќи го користеле многу ретко или повеќе не го користат.

Користените седишта не само што најверојатно ќе ги реупотребувате без упатствата на производителот, што се од големо значење за правило поставување во автомобилот, би можеле да им недостасуваат важни делови за кои што не би се сеќавале или воопшто не би ни знаеле дека постојат. Освен тоа, пластиката со текот на времето станува почувствителна и кршлива бидејќи старее, па за седиштето кое е старо повеќе години постои ризикот полесно да се скрши во несреќа.

Прочитајте:  Кавасаки синдром: Симптоми и причини за појава

Доколку немате избор и мора да користите детско седиште кое е веќе употребувано од вас или ваши пријатели, проверете дали има оригинални упатства или контактирајте го производителот за замена, ги има сите свои делови и осигурајте се дека никогаш не било вклучено во сообраќајна несреќа.

Прерано го преместувате детето од неговото седиште

Иако законите за безбедносни седишта варираат, несомнено повеќето потенцираат дека децата под 5 години задолжително треба да се возат на безбедносно седиште. Експертите предупредуваат и постојано даваат препораки за безбедно возење на децата во автомобил. Тие, всушност, велат дека децата и по петтата година треба да се возат во безбедносно седиште и тоа сè додека тежат најмалку 40 килограми или додека нивните рамења повеќе не се вклопуваат под сигурносните ремени на седиштето.

Неправилно го поставувате безбедносното седиште

Седиштето за безбедност нема да ја заврши својата работа ако е погрешно поставено во автомобилот. Се проценува дека многу безбедносни седишта се поставуваат погрешно бидејќи родителите често не ги читаат упатствата за поставување и ги преземаат работите во свои раце.

Меѓу најчестите грешки кои се прават се:

  • седиштето во возилото не се зацврстува доволно;
  • не се употребува вистинскиот безбедносен ремен за заштита на детето;
  • не се проверува дали седиштето може да падне нанапред или да се лизне странично во автомобилот.

Го земате детето во раце

Ретко кој родител може да го остави своето дете да плаче додека се вози на безбедносното седиште во автомобил. Особено кога станува збор за подолго патување коешто детето не може да го издржи седејќи во едно место или пак за кратко возење кога родителите се мрзеливи и сметаат дека ќе изгубат многу време да го врзуваат детето во седиштето, па решаваат накратко да го земат во раце. Сепак, многу е важно да избегнувате да го земате вашето дете во раце, дури и ако постојано плаче бидејќи така ризикувате да се повредите двајцата доколку се случи несреќа.


Споделете со пријателите!