Хороскоп за 47ма недела: прочитајте какво ќе биде вашето здравје, за да знаете што ви е и пак ништо да не преземете. Оваа недела овенот ќе пука од енергија, девицата упорно ќе дели совети за здрав живот, додека лавот ќе продолжи да ја игнорира правејќи кругови со чадот од цигарата.
Овен
Со вашиот вишок на енергија и понатаму ќе продолжите да ги нервирате сите околу себе. Ова однесување ќе биде најкритично во недела, општо познат како ден за лежење или вашиот најомразен ден.
Бик
Како знак кој сака активности на отворено, планиравте да трчате на кеј. Но бидејќи вие сте модерни и информирани, сте провериле дека загаденоста на воздухот ќе биде висока неделава. Ништо, морате да чекате нареден понеделник.
Близнаци
Како и досега, вие очекувате вашиот двојник да се грижи за сè, па така и за вашето здравје. Само никако да се договорите со себе со која физичка активност да почнете да се занимавате.
Рак
Не знаеме дали ви кажал некој, но одењето две напред, три назад, не е физичка активност. Секогаш сте креативни во наоѓање изговори како да избегнете здрава храна. За брокулата велите дека не јадете мали дрвја, цвеклото бил крвав корен. Вие сте една шега од човек!
Лав
Продолжете да ги игнорирате советите на оние што се грижат за вас. Фраерски запалете уште една цигара и не ја вадете од уста, иако чадот ви е во очи и ви поттикнува солзи. Секогаш кул.
Девица
Упорно им кажувате на сите околу вас дека не треба да се настинати за да пијат лимонада и чаеви. Залудно. Сè додека живеете овде, вие ќе бидете несфатени и хипици. Барем сте фит, па раат можете да им се потсмевате на сите што ќе ви кажат дека замарате.
Вага
Уморни сте од постојаното балансирање. Знаеме, совршеноста знае да биде исцрпувачка. Освен тоа, принципиелноста е интересна само како особина, но никој не сака да се дружи со неа. Тоа што не одите никогаш на кафе бидејќи пиете смуди, може да доведе до една состојба наречена осаменост.
Шкорпија
Престанете со мистериозноста и сфатете дека никому не му е гајле за вас. Никој не сака да знае што необично сте јаделе вчера и како сте вежбате нов вид на јога. И оваа недела ќе продолжите непотребно да си го комплицирате животот што може да доведе до главоболки. Не, нема да е мигрена туку обична главоболка, напијте се едно апче и престанете со драмата.
Стрелец
Постојаната потрага по барањето на смислата на животот, ви предизвикува симптоми на грип. Ништо не ви е, можеби ви е само од воздухот. Или од главата. Смирете се, добрата вест е дека ништо нема да се промени, додека лошата вест е дека ништо нема да се промени.
Јарец
Ви кажале дека треба да се смеете додека разговарате со некого за да оставите пријатен впечаток? Престанете, тоа не важи за вас, изгледате страшно. Песимизмот ви изглегува од секоја пора, немојте да се трудите залудно, кога знаете дека пак сите ќе ве избегнуваат. Јадете повеќе чокололадо за да се расположите барем малку.
Водолија
Дали знаете дека се потребни 72 различни мускули за говор? Но тоа вас не ве интересира, бидејќи и така нема да отворите уста, вие сè знаете и не планирате да го споделите вашето знаење со никого. Во ред, знаеме дека сте посебни.
Риби
Вечно растргнати меѓу реалноста и мечтите, веќе не можете да одредите што е што. Задоволни сте од одразот во огледало а заборавате дека токму тоа огледало го купивте самите само затоа што во него изгледате 5 килограми послабо. Реалноста нема да ве удри многу силно неделава, така што опуштете се пред телевизор и задоволно дремнете си.
