Ако сте љубители на зачини и на супи тогаш ќе уживате во овој рецепт
Оваа супа е според мексикански рецепт, во прилагодена и поедноставена верзија. Едноставно изгледа ама ќе сакате да си ставите и втора чинија, особено ако сакате зачини. Се надеваме дека ќе ви се допадне. Додавањето сок од лимон на крај е неопходно. Всушност, убавината на супава е во додатоците на крај, особено лимонот, павлаката и чипсот.
- 800 гр. пилешко месо со коски (во зависност од големината на кокошката, може да искористите 5 копани како мене, или 2 копан со докопан);
- 300 гр. замрзната пченка;
- 400 гр. кафеав грав од конзерва (или дома сварен);
- 1 кромид со средна големина;
- 400 гр. течен сос од домати (пасата) или конзерва домати- испасирани;
- 1 лажиче кориандер во прав (зачинот не тревката);
- 1 лажиче кумин;
- 1 лажиче чили зачин (ова зависи од колку ви е љуто чилито);
- сол, бибер;
- 2 лажици масло.
За во чинија потребно ви е: сок од лимон или зелен лимон, павлака, тортиља чипс, свеж кориандер. Сварете ги парчињата пилешко месо во околу литар и пол вода и без сол (моите копани беа готови за 25 минути). Оставете ги да се изладат надвор од супата, и потоа исчистете го месото од коските и ситно искинете го. Тргнете ја супата од тенџерето, ама не ја фрлајте. Во тенџерето ставете 2 лажици масло и околу 2 минути на среден оган испржете го ситно исецканиот кромид. Додајте го пилешкото месо, супата во која се варело пилешкото, пченката, гравот, сосот од домати и сите зачини. Посолете по вкус и оставете ја супата да се вари околу дваесеттина минути, за сите вкусови да се спојат. Пробајте ја супата и додадете чили или сол ако треба. Сервирајте ја супата и врз неа ставете лажица павлака, лажиче сок од лимон, свеж магдонос или кориандер, а отстрана послужете тортиља чипс.
Уживајте!
* рецептите со во целост преземени од ситно сецкано
