Денес е Светски ден за борба против ракот
Светскиот ден на ракот, секоја година се одбележува на 4-ти февруари и претставува иницијатива под која Унијата за меѓународна контрола на ракот (UICC), нејзините членови, партнери, поддржувачи и целиот свет може да се обединат во борбата против глобалната епидемија на рак.
Целта на Светскиот ден на ракот 2016-2018 е да пронајде начин на кој сите, на колективно и на индивидуално ниво, можат да придонесат за да се намали светската стапка на ракот.
Зошто е потребно да се одбележува овој ден?
Статистиките на светско ниво се поразителни. Над 8, 2 милиони луѓе умираат од рак секоја година, а половина од нив се на возраст од 30 до 69 години. Со најголем пораст се земјите со низок и среден приход, оние што се најмалку подготвени да се справат со социјалните и економските последици од болеста. Во Македонија морталитетот од рак постојано расте, а старосната граница се намалува.
Светскиот ден на ракот е можност да се зголеми свеста за оваа болест кај сите нас, бидејќи колку е поголема свеста и информираноста за ракот, толку побрзо може да се детектира, бидејќи редовните прегледи и раната детекција остануваат примарни за успешно лекување. Обезбедување на достапноста и пристапот до програмите за раното откривање на рак може значително да го намалат товарот од оваа болест во сите земји.
Доколку итно не се преземат мерки за подигање на свеста за ракот и развивање на практични, мултисекторски стратегии за решавање на оваа болест, милиони луѓе ширум светот ќе продолжат да умираат прерано или ќе страдаат секоја година.
За секои 100 луѓе кои се разболуваат од рак, повеќе од 30 случаи можат да бидат спречени со водење на здрав начин на живот или со имунизација против инфекции кои предизвикуваат рак.
Намалување на социјалните и надворешните ризик-фактори за појава на рак и поттикнување на луѓето да прават здрави избори се клучни компоненти за постигнувањето на глобално сеопфатна цел – намалување на прерани смртни случаи од незаразни заболувања за 25% до 2025 и постигнување на посакуваните цели од Светската декларација за рак.
